EFF dreig boere, banke en DA

Julius Malema. Foto: EFF/Twitter

Julius Malema, leier van die EFF, het Sondag gewaarsku die banksektor en Afrikaner-boere moenie probeer saamsweer in ʼn poging om grondonteiening sonder vergoeding te laat misluk nie.

Malema het EFF-ondersteuners in ʼn stampvol Standard Bank-arena in Johannesburg toegespreek waar die party ʼn kiesersregistrasieveldtog met die oog op volgende jaar se algemene verkiesing van stapel gestuur het.

“Boere neem nou ʼn verband op hul plaas uit en gee so die plaas aan die bank sodat hulle kan sê dit behoort aan die bank wanneer ons daar aankom. Hulle wil saam met die banke werk om die proses van grondonteiening sonder vergoeding te laat misluk.

“Ons waarsku die Suid-Afrikaanse banke dat enige plaas waarop ʼn verband ná Desember 2017 geregistreer is, nie deur ons regering betaal sal word nie.

“Die huisverbandstelsel is in elke geval ʼn misdadige sindikaat wat net van die mense steel. Ons het geen respek vir verbande nie. Ons het geen respek vir banke nie, want die misdadigers bestuur die banke. Ons waarsku die banke: Ons is op die punt om grond sonder vergoeding te onteien.”

Hy het daarop voort gehamer dat die grond gesteel is tydens verskeie volksmoorde en dat beleggers nie onttrek het toe wette keer op keer teen swart mense ingestel is nie.

Julius Malema. Foto: EFF/Twitter

“Niemand het die land verlaat toe grond gevat is en vir wit mense gegee is nie, maar noudat ons sê grond moet gevat word en aan die mense teruggegee word, nou sê hulle mense gaan die land verlaat. Want swart mense verdien nie om land en eiendom te besit nie, dit is ʼn bedreiging vir witheid as dit gebeur.

“Ons praat nie net van die land nie, ons praat van die genesing van swart mense se pyn oor die verlede as ons sê die grond moet teruggee word.”

Malema het ook gesê niemand moet met oorlog dreig wanneer dit by die grondkwessie kom nie.

“Die EFF wil nie ʼn burgeroorlog hê nie. Diegene wat met oorlog dreig bewys net hulle is nie-denkers. Nou is die tyd van die denkers.

“Kom laat ons praat oor hoe ons die grond in die hande van die mense gaan kry deur dialoog en robuuste debat sonder enige dreigement van ʼn burgeroorlog. Ons is nie bang vir oorlog nie, maar ons weier net om van oorlog te praat in ʼn tyd van vrede.

Hy het gesê daar moet nou landboukolleges ingerig word wat kan help om die mense op te lei ter voorbereiding op die grond wat hulle gaan terugkry.

Malema pak Trollip en DA

Athol Trollip, die burgemeester van die Nelson Mandelbaai-metro. Foto: Facebook

Malema het die EFF se planne om Athol Trollip uit die amp as burgemeester van die Nelson Mandelabaai-metro in Port Elizabeth te verwyder, herhaal. Die party is van voorneme op 6 April ʼn mosie van wantroue in dié metroraad in te dien.

Die verhouding tussen die DA en EFF het verlede week erg versuur nadat die DA teen die EFF se mosie in die parlement gestem het om ʼn proses te begin om die grondwet te verander om voorsiening te maak vir grondonteiening sonder vergoeding.

Malema het gesê Trollip sal verwyder word omdat hy wit is, maar dit beteken nie dat Solly Msimanga, die burgemeester van Tshwane, en Herman Mashaba, die burgemeester van Johannesburg, onaangeraak sal bly nie.

“Hoekom nie Mashaba nie, hoekom nie Solly nie? Want die burgemeester van die DA in PE is ʼn wit man. As jy hierdie mense hard wil slaan – dan moet jy begin by ʼn wit man – dit sal hulle baie seermaak. Ons sny die keel van witheid af. Trollip sal ná 6 April nie meer die burgemeester wees nie.”

Hy het ook gesê die EFF is nie in ʼn verhouding met die DA nie. Hy het die party as ʼn tipiese boelie beskryf wat gestraf moet word omdat hulle teen die EFF se mosie vir grondonteiening gestem het.

“Ons gaan nie skei van die DA nie. Ons vou ons arms, ons was nooit vriende nie. Al die wit mense wat vir die DA stem en nou kwaad is oor wat die EFF in Port Elizabeth gaan doen, en wat ons beledig sedert die aankondiging en sommige in die media gemobiliseer het om ons te beledig, almal van julle kan saam hel toe gaan!” het hy onder ʼn luide gejuig gesê.

Argieffoto

“Ons gee nie om vir wit gevoelens nie. Trollip verdien niks van ons nie. Ons haat nie wit mense nie, ons is net lief vir swart mense. Een kêrel, een meisie. Jy kan nie twee kêrels of twee meisies hê nie. Ons is verlief op swart mense – dit is wie ons is.”

Malema het ook bygevoeg dat die EFF nie die ANC vertrou nie. “Ons vertrou nie die ANC nie omdat die ANC en die DA dieselfde is. Die een is korrup en die een is rassisties. Hulle is deel van dieselfde WhatsApp-groep, hulle is dieselfde.”

Malema het ook weer herhaal dat die EFF vir Mcebisi Jonas, die voormalige adjunkminister van finansies, sal ondersteun om die volgende burgemeester van Port Elizabeth te word.

Op die onderwerp van stemregistrasie het Malema later gesê enige swart mense wat vir die DA stem, is ʼn gevaar vir die samelewing.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

130 Kommentare

jongste oudste gewildste
Buitestander

Die Julius Malema moet nie dink omdat hy sy plaas in Limpopo verloor het oor sy SWAK bestuur hy kan alle boere van die plase af verdryf met sy opstook praatjies.

GM

Hulle is net lief vir die witman se belastinggeld ja. Ons moet maar ophou help as daar gebedel word ook. Laat Malema almal help.

snoefie

ou julius wil nou stemme met grond koop. gee jou grond eerste. ek sal ook R1000 per akker vir 99 jaare gaan betaal.

Johannes

Roep die Boerevolk bymekaar – dit is nou die tyd vir ‘n krisisberaad! Ons beter vinnig aksieplanne op die tafel kry!

Jerry

Malema se dreigemente hou op hierdie stadium nie veel gevaar in nie, maar dit kan wel in die toekoms . Sy oorbeklemtoning dat die EFF nie n burgeroorlog wil he nie beteken dat hulle n burgeroorlog wil he, maar eers wanneer die EFF meer getalle en mag het. As dit dus van die anargiste afhang sal SA n burgeroorlog he en daarom is dit belangrik dat alles moontlik gedoen moet word om die EFF as n rassistiese en anargistiese party te brandmerk vir wie daar nie plek is in n multi rasse en nie-rassistiese demokrasie.