eNCA: Malema se bewerings nié feitelik of akkuraat

Julius Malema, leier van die EFF. Foto: enca.com

Die Suid-Afrikaanse uitsaaier eNCA sê Julius Malema, EFF-leier, se bewerings dat die uitsaaier wit mense in sy nuusdekking beskerm, is ontstellend en onwaar.

Mapi Mhlangu, eNCA-hoofredakteur, sê dié bewerings strook nie met die maatskappy se kernwaardes nie.

“Ten spyte daarvan dat ons relatief klein is as nuusorganisasie, wy ons ons beperkte hulpbronne deurlopend aan stories wat geregtigheid, gelykheid en menseregte in ons nuus aanspreek. Dít is in lyn met ons beleid dat ons nuus sonder vrees of guns aanbied. Ons personeel vertel deurgaans stories oor dinge wat nie reg is in ons land nie, hoe dit herstel kan word en hoe ons mekaar verantwoordbaar kan hou,” sê sy.

Malema het op Twitter teruggekap en gesê hy het verwys na eienaarskap by die uitsaaier en dat daar ʼn verskil tussen eienaarskap en redaksionele besluite is. “Julle [eNCA se] redaksionele besluit is bloot om die wit oppergesag te bevorder. Dis al. eNCA bevorder die anti-swart-agenda en julle kan ons nie daaroor mislei nie, ons sien dit raak.”

Hy het vroeër gesê “daar is geen twyfel” dat eNCA “ʼn platform is wat die wit oppergesag bevorder” nie. “Ek dink die EFF moet werklik in diepte vergader oor die rol wat eNCA speel in die voortsetting en beskerming van wit bevoorregting om te sien of ons nie tot dieselfde gevolgtrekking kan kom as wat ons met ANN7 het nie. Ek weet nie, miskien is ek verkeerd, maar ʼn behoorlike gesprek hieroor sal tot dieselfde afleiding lei.”

Mhlangu het egter in ʼn verklaring gesê Malema se karakterisering van eNCA is nié akkuraat nie. Volgens haar is die uitsaaier se grootste aandeelhouer Hosken Consolidated Investments (HCI), ʼn swart-bemagtingsmaatskappy.

“Die personeellede by eNCA is verteenwoordigend van die diversiteit van mense wat in Suid-Afrika woon. Hulle vertel stories van uiteenlopende politieke sienswyses en ervarings wat verseker dat ons stories op ʼn manier vertel wat sóveel Suid-Afrikaners waardeer dat ons die mees gekykte kanaal onder die nuuskanale [in Suid-Afrika] is.”

Volgens Mhlangu het Malema ook dreigemente aan van die uitsaaier se joernaliste op sosiale media gerig. “Die rol van die media en die veiligheid van diegene wat in hierdie belangrike sektor werk kan nie oorbeklemtoon word in die jaar wat voorlê nie – ʼn jaar waarin Suid-Afrika se belangrikste algemene verkiesings nóg gehou gaan word sedert die afskaffing van apartheid. Ons moet herinner word aan die rol wat Suid-Afrika se joernaliste en media-organisasies gespeel het om diegene met gesag verantwoordbaar te hou asook die sleutelrol wat die joernaliste in die beskerming van die demokratiese gespeel het.”

Mhlangu sê as enige politieke leier of party fout vind met ʼn media-organisasie in Suid-Afrika se nuusdekking, kan hulle dié kommer met die Uitsaaiklagtekommissie van Suid-Afrika (BCCSA) bespreek. Sy sê die uitsaaier hou hom streng by die kodes van dié liggaam en beskou die BCCSA se waardes ook as sy eie kernwaardes.

“eNCA is ʼn liggaam wat gestig is deur mense wat teen rassistiese oorheersing in Suid-Afrika gekant was. Honderde personeel van die uitsaaier, wat elke dag ongelooflik hard werk, herbevestig daagliks hul verbintenis tot ʼn demokratiese land waarin ons verskeie sienings binne die grondwetlike demokrasie vier en verwelkom.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Charlotta

Ek wonder waar kom Malema daaraan, dat eNCA vir die witmense is. Hulle saai nooit die plaasmoorde uit nie. Dis altyd net wat die wittes verkeerd doen, volgens die eff.

Eish

Seker oor sy luitenant n joernalis aangerand het en dié dit nie daar gaan laat nie. Nou braai hy gal.

Engela Schwim

Wolf jy slaan die spyker op sy kop.

Jerry

Ignoreer die EFF se uitsprake en idees en dan kom daar niks van nie. Reageer daarop dan gee jy dit stukrag en maak jy jouself beskibaar om geblameer te word! Die EFF gooi n klip (idee) in die bos en as die klip jou tref en jy spring uit die bos dan word jy geteiken en geblameer. Hulle het dit met Afri-Forum gedoen met “Afrikaans must fall”. Goeie raad is, as die klip jou tref, moenie spring nie!

Rynhardt

eNCA het in sy bestaan nog nooit blankes in enige positiewe lig gestel nie.eNCA bevoordeel net sy geliefde Anc!Malema het n obsessie met wittes!Kry n lewe Malema.????????