Enock Mpianzi: “Ons het bly sê hy is weg”

Enock Mpianzi (13).

Vriende van die 13-jarige Enock Mpianzi wat verlede week op ʼn gr. 8-kamp van die Parktown Boys’ High School verdrink het, het herhaaldelik aan kamppersoneel gesê Enock is weg. Hulle is egter telkemale weggewys sonder verdere ondersoek na waar Enock hom bevind.

Vrae het ontstaan oor die tydsverloop tussen Enock se verdwyning Woensdag en die aanvang van die soektog Donderdagmiddag. Die seuns het by die Nyathi-sportkamp buite Brits in Noordwes gekamp.

In ʼn onderhoud op Talk Radio 702 het een van Enock se klasmaats die sluier gelig oor wat presies dié dag by die kamp gebeur het. Die seun, net bekend as Sizo, se van word weerhou uit vrees vir viktimisering.

Sizo (13) vertel hy en sy vriend, Solly, het met Enock vriende gemaak net voor hulle op die bus na Nyati geklim het. Volgens Sizo het die onderwysers nie ʼn teenwoordigheidslys afgemerk van die seuns voor hulle op die bus geklim het óf na hulle by die kamp aangekom het nie.

“Toe ons by die kamp aankom, het ons onmiddellik begin met ʼn aktiwiteit waartydens ons ʼn draagbaar moes bou. Enock was in my span,” vertel die seun. “Toe ons klaar die draagbaar gebou het, is ons almal af na die rivier. Die onderwysers was nie by nie, slegs die kampfasiliteerders en ʼn paar prefekte.” Sizo sê kamppersoneel het leerders gevra wie kan swem. “Enock het aangedui dat hy kan swem. Dié wat kon swem moes toe in die Krokodil-rivier spring en regmaak om met die draagbaar resies in die water te hou. Hulle het nie vir ons reddingsbaadjies gegee nie. Ons is ook nie gevra om reddingsbaadjies saam te bring nie.”

Parktown Boys High School (Foto: Google Maps Street View)

Sizo sê die rivierstroom was baie sterk en die draagbaar het binne minute omgeslaan. “Elke span het ʼn rubberpyp (tube) gekry waaraan ons kon vasklou, maar Enock het gesukkel om daarby uit te kom. Hy het net op een plek bly swem. Ek het probeer om ʼn stuk hout na hom uit te hou, maar hy kon nie by dit uitkom nie. Een van die ander seuns het geskree om hulp, maar daar was geen grootmense in die omtrek nie.”

Sizo sê toe hulle om ʼn draai in die rivier kom, het hy vir Enock verloor. Van die kamppersoneel het ʼn entjie verder op die wal gestaan en die seuns uit die water gelig soos hulle verbygekom het. “Die stroom was baie sterk. Ek sou nie self kon uitkom nie,” sê Sizo.

Hierna is die seuns na die saal gejaag, waar daar vir die eerste keer ʼn teenwoordigheidslys afgemerk is. “Toe hulle Enock se naam uitroep, het Solly sy hand opgesteek. Die personeellid het hom gevra of hy Enock is en toe hy sê ‘nee’ het die personeellid net aangeloop.”

Sizo sê hy en Solly het verskeie kere deur die loop van die middag aan kamppersoneel probeer vertel dat Enock nie meer by hulle is nie. “Van die personeel was baie ongeskik en het ons weggewys. Ander het gesê hy het nie op die kamp gekom nie of is saam met ʼn ander groep op die kamp.”

Polisieduikers het Enock se liggaam in die rivier gevind. (Foto: Panyaza Lesufi/Twitter)

Donderdagoggend is nóg ʼn teenwoordigheidslys afgemerk. “Een van die onderwysers het gesê hy dink nie Enock het op die kamp gekom nie. Ons het egter die onderwyser genader en gesê Enock was beslis op die kamp. Toe eers is ʼn soektog begin, hoewel aktiwiteite by die kamp voortgegaan het,” vertel Sizo.

Intussen het Nyathi-kampterrein hul stilte verbreek en by monde van hul prokureur, Daniël Eloff, bevestig dat die seuns Woensdag aan ʼn aktiwiteit moes deelneem wat behels dat hulle resies moes hou met ʼn draagbaar in die rivier. “Die aktiwiteit het plaasgevind in die vlak kant aan die buitewyke van die rivier en 17 van Nyati se kampfasiliteerders en personeellede van die skool het toesig gehou,” sê Eloff.

Die draagbaar is glo ondersteun deur vier gepompte binnebande. “Leerders het opgewonde geraak en mekaar begin verbysteek om voor te kom. Dit het ʼn gevaarlike situasie geskep, omdat van die leerders na die dieper kant van die rivier beweeg het waar die stroom sterker was, in ʼn poging om die ander verby te steek.”

Eloff sê fasiliteerders moes drie van die seuns uit die water help en die aktiwiteit is onmiddellik stopgesit toe personeel besef dat dit te gevaarlik raak. “Op geen punt het die fasiliteerders besef dat een van die kinders deur die stroom meegesleur is nie.”

Volgens Eloff het die personeel Woensdagaand gekyk wie teenwoordig is en agtergekom agt van die leerders is nie teenwoordig nie. “Ongelukkig het die skool nie ʼn opname van leerders geneem voordat hulle by die skool vertrek het nie, so daar was geen manier om te weet of die afwesige leerders wel die kamp bygewoon het nie.” Hy sê eers nadat die ouers van dié agt leerders laat Donderdagoggend gekontak is, kon hulle vasstel Enock is weg.

“Die standaard noodprosedures is onmiddellik in werking gestel en lede van die gemeenskap en polisie is in kennis gestel om te help met die soektog.”

Eloff sê die Nyati-kamp spreek hul diepste meegevoel met die Mpianzi-familie uit weens hul tragiese verlies. “Ons deel Enock se geliefdes se pyn en ons personeel ontvang ook berading.  Nyati sal sy volle samewerking gee in alle ondersoeke wat gedoen word en toegang tot die eiendom bied,” sê Eloff.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

72 Kommentare

jongste oudste gewildste
Kaa

Daai kampterrein het al van tevore n kind se lewe gekos, en daar is al vir jare lank gemaan dat die plek as onveilig moet beskou word. Met swak personeel en nog swakker toesig.

Sarel

Wonder of maak die skool gebruik van vrywaringsforms?
Ons mag nie op ‘n bus geklim het as dit nie in plek was nie.

karen

Dit is nog steeds baie baie hartseer. Niks wat enige iemand nou kan of wil doen gaan vir Enoch terugbring nie. As dit wat Sizo sê waar is – daar is net een word : NALATIG! Dit is een tragedie te veel. Hoop skole en kampterreine besef die erns van die verantwoordelikheid van kinders onder hul toesig en neem aksie. Pro-aktiewe maatreëls nog meer opskerp.

Elsabe

Dis uiters swak! Van beide die skool en die kamp terrein. Dit is OHS vereistes om ten alle tye te weet wie jy op jou werksperseel het. Punt die kampterein het dit nie gedoen nie en was nalatig! Die arme ouers het hul kind verloor.

WELKOM

Skole is somtyds baie nalatig en dan DWING hulle die ouers om vrywaringsvorms te teken

Daadie papier is nie dit werd waarop dit geskryf is nie.

Hulle moet die skoolhoof aankla van stafbare manslag omdat hy die verantwoordelike persoon bly in wie se hande die ouers die verantwoordelikheid geplaas het