Eskom se Mabuza val op sy swaard oor beurtkrag

Jabu Mabuza (middel) verwelkom pres. Cyril Ramaphosa voor die president se vergadering met Eskom in Desember verlede jaar. By hom is Pravin Gordhan, minister van openbare ondernemings. (Foto: Jairus Mmutle/GCIS)

Jabu Mabuza het as voorsitter en direkteur van Eskom bedank.

“In sy bedankingsbrief het mnr. Mabuza om verskoning gevra vir Eskom se onvermoë om die belofte wat hy aan die president, die adjunkpresident en die betrokke ministers by ʼn vergadering op 11 Desember verlede jaar gemaak het om beurtkrag oor die [Kers-] te verhoed, na te kom,” het die presidensie vroeg Vrydagaand gesê.

Eskom het by dié vergadering planne voorgelê om te verseker dat beurtkrag tot 13 Januarie nie sal plaasvind nie. Eskom het terselfdertyd die risiko’s vir die nasionale netwerk uiteengesit.

Die sukkelende kragvoorsiener het egter in die eerste naweek van Januarie al inderhaas beurtkrag in werking gestel. Die situasie het oënskynlik nog nie juis verbeter nie en beurtkrag geld tot minstens 23:00 vannag.

“As die minister met die verantwoordelikheid vir Eskom, het die minister van openbare ondernemings, Pravin Gordhan, mnr. Mabuza se bedanking aanvaar.

“Pres. [Cyril] Ramaphosa het sy dankbaarheid uitgespreek teenoor mnr. Mabuza vir sy diens aan Eskom én die land tydens ʼn uitdagende tydperk. Hy het mnr. Mabuza geloof dat hy verantwoordelikheid aanvaar het vir gebeure wat onder sy leiding plaasgevind het,” het die presidensie in ʼn verklaring gesê.

Die presidensie sê hy steun steeds die stappe wat Eskom doen om betroubare elektrisiteitsvoorsiening as ʼn saak van dringendheid te verseker en gaan voort met maatreëls om ʼn nuwe generasie kapasiteit – waaronder ook selfopwekking – so gou moontlik in werking te stel.

“In die lig van mnr. Mabuza se bedanking gaan die regering binnekort ʼn hersaamgestelde Eskom-raad aankondig met die gepaste mengsel ervaring uit die elektrisiteitsbedryf, ingenieurswese en korporatiewe regering.”

Ramaphosa het Mabuza sterkte met sy toekomsplanne toegewens.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Gemaskerde Sopbeen

Eskom se arbeidspiramide is onderstebo……….dis net bestuurders en voorsitters en direkteure waar jy kyk………en niemand om die werk te doen nie. Hierdie is g’n niks van “val op ‘n swaard nie”? Die regerende party is al vir 25 jaar besig om by AL die SBI’s een na die ander miljardêr te genereer…..Jy stap in, kry die pos sonder dat enige vrae gevra word, kry jou miljoene per jaar plus bonusse, maak ‘n gemors van alles, en maak plek vir die volgende een…….Gaan kyk maar.

Strandloper

Jippeeeeeee…kry seeker weer so 30 miljoen….glad nie so stupid nie…

Basjan

Ek hou van die uitdrukking: “Eskom se Mabuza val op sy swaard oor beuertkrag.” Ek dink egter nie dat hy dit bloot uit eie vrye wil gedoen het nie. Dit pas net nie in by die ANC kaders se profiel nie. Hy moes van iewers af onder druk geplaas gewees het om president Ramapohsa se beeld te probeer “in ere te herstel”.

Chris

Drie raaie waar gaan mnr Mabusa in die nabye toekoms n nuwe begin maak . My raai in parlement ad adjunk minister van energie. Die kader mit vergoed wird vir sy deel om die land nader aan rommel status te bring

André André

As Cyril se swaard waarin hy moes val nie meer gekos het nie?