Foto’s: Lesotho toe onder sneeukombers

Lesotho onder sneeukombers toegevou (Foto: AfriSki/Martin Schultz via Twitter)

Die eerste sneeu van die winterseisoen het sedert Dinsdagaand oor gedeeltes van die Drakensbergreeks begin val en het Woensdagoggend nog voortgeduur.

Die AfriSki-oord by die Maluti-berge en die Tiffendell-oord digby Rhodes in die Oos-Kaap was Dinsdagaand onder ’n sneeukombers toegevou, nadat sneeu deur die loop van die nag hier geval het. Ligte sneeu het ook in ander plekke in die Oos-Kaap voorgekom.

Vanetia Phakula, ʼn weervoorspeller van die Suid-Afrikaanse Weerdiens (SAW), het gesê koue weer kan tot Vrydag in groot dele van die land verwag word, met maksimum temperature wat wissel tussen 19 °C en 25 °C.

Minimum temperature van onder 10 °C word in groot gedeeltes van die Vrystaat, die Noord-Kaap, Mpumalanga en die Oos-Kaap vir die res van die week verwag. Die temperature gaan weer teen die naweek begin styg.

Die weerdiens het Woensdag ’n waarskuwing uitgereik vir swaar donderbuie wat moontlik tot kitsvloede kan lei aan die suidoostelike kus in die omgewing van Port Alfred en Port St Johns. Geen donderbuie word vir die res van die land verwag nie.

Phakula sê daar is ’n 30%-kans vir ligte reën oor die naweek in groot gedeeltes van Limpopo, Mpumalanga, KwaZulu-Natal en Gauteng.