Gigaba: ‘Dís hoekom ek bedank’

malusi-gigaba-ANA

Malusi Gigaba het as minister van binnelandse sake bedank. Foto: ANA

Malusi Gigaba wat Dinsdag te midde van erge openbare druk uit sy posisie as minister van binnelandse sake bedank het, sê hy het dié besluit geneem ná “’n lang tydperk van volgehoue en giftige openbare aanvalle op sy integriteit”.

Gigaba sê hy het besluit om eerder sy bedanking in te dien aangesien die integriteit en openbare beeld van die regering en die ANC belangriker as enige politieke ampsdraer is. “Ek wil dit graag stel dat my bedanking nie ʼn skulderkenning van my af is nie,” het Gigaba in ʼn verklaring gesê.

“In hierdie verband is ʼn aansoek ingedien vir geregtelike hersiening van die openbare beskermer se bevindinge rakende die Fireblade Aviation-saak en is ek ook van voorneme om alle ander sake te verdedig wat spruit uit my termyn as kabinetslid.”

Gigaba sê sedert hy in 2004 ʼn adjunkminister geword het en daarna ʼn lid van die kabinet in 2010, het hy sy pligte na die beste van sy vermoë uitgevoer. “In al die departement waarin ek ontplooi was, was ek bevoorreg om saam met toegewyde en bekwame kollegas en lede van die burgerlike diens te dien.”

Gigaba het die ANC en ander staatsamptenare bedank vir dié geleenthede. “Ek wil veral vir pres. [Cyril] Ramaphosa bedank vir sy ondersteuning en vertroue in my sedert Januarie vanjaar. Ek bly steeds ʼn toegewyde en gedissiplineerde lid van die ANC en sal voortgaan om enige take uit te voer wat die organisasie vir my opdrag te gee om te doen.”

Gigaba se bedanking kom nadat ʼn storm om sy kop losgebars het toe die openbare beskermer verlede maand in ʼn verdoemende verslag bevind het Gigaba het die Grondwet én die kabinet se etiese kode oortree. Dít nadat regter Neil Tuchten op 17 Desember verlede jaar in die Noord-Gautengse hooggeregshof – in die saak tussen die Oppenheimer-familie se Fireblade Aviation en die minister van binnelandse sake – bevind het Gigaba het doelbewus onder eed gelieg oor nasionale sleutelpunte.

Terwyl Gigaba onder kritiek oor dié bevindinge deurgeloop het, moes hy opnuut vure doodslaan toe ʼn video van seksuele aard van hom aan die lig gekom het. Hy het gesê dié video was vir sy vrou bedoel en kuberkrakers het toegang tot sy staatselfoon gekry en wou die video gebruik om hom af te pers.

Net meer as ʼn week gelede het Gigaba in ʼn onderhoud met eNCA gesê hy sal ondanks die druk uit verskeie oorde nie as minister van binnelandse sake bedank nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Yankee

What a stupid man!!

A

Ek wonder wat verdien hierdie mense. Dat hulle net sommer bedank en dan nog wil aangaan met hofsake wat enorme bedrae is. Waar op aarde kom die volgende maand se kos vandaan as jy net sommer kan bedank.

Droë Perske

Watter integriteit?

Martin

Hy lieg.

Frikkie Geld en huis

Met daai klein dingetjie?????