‘Halfhartige hervorming’ van brandstofprysformule help nie

branstof petrol diesel verbruiker Caltex petroljoggie vervoer

Die brandstofprys het die afgelope jaar met sowat 40% gestyf. (Foto: Maroela Media)

Solidariteit het Dinsdag die voorstelle van die minister van minerale hulpbronne en energie, Gwede Mantashe, en die minister van finansies, Enoch Godongwana, dat aanpassings aan die brandstofprysformule nodig is, verwerp.

Godongwana het verlede week gevra vir veranderings aan die formule nadat die prys van brandstof opnuut ʼn rekordhoogte bereik het.

Hy het Vrydag in die parlement gesê hy is bekommerd oor die prys van brandstof “tot so ʼn mate dat ons moontlik ʼn rol sal moet speel om te doen wat ons ook al kan om die hervorming van die brandstofprys te ondersteun”.

Mantashe het op sy beurt aan LP’s gesê die skeiding van die brandstofheffing van brandstofpryse kan moontlik ook help.

Volgens Solidariteit sal aanpassings aan die brandstofprysformule enersyds onvoldoende wees, en andersyds sal dit ʼn hindernis wees om werklike, volhoubare verligting vir Suid-Afrikaners teweeg te bring.

“Blote aanpassings sal nie ver genoeg gaan nie. Halfhartige pogings tot hervorming sal eerder in die pad van goedkoper brandstof staan. Om, soos Mantashe voorstel, die brandstofheffing van pryse te skei, sal niks doen om die las op verbruikers te verlaag nie, maar sal eerder ʼn ekstra administratiewe las op verbruikers plaas,” sê Theuns du Buisson, ekonomiese navorser verbonde aan die Solidariteit Navorsingsinstituut.

Volgens Solidariteit is die enigste manier om brandstofpryse konsekwent te verlaag deur middel van belastingverligting en die deregulering van petrol.

“Die oplossing is tweeledig: Eerstens moet die heffing verlaag word. Tweedens moet die brandstofprys gedereguleer word. Terwyl die minister kibbel oor die prysformule kan almal veel groter baat vind by ʼn volkome deregulering – die wegdoen van die prysformule in sy geheel,” sê Du Buisson.

Solidariteit het verlede maand al aan albei ministers geskryf oor die ingrypende styging in brandstofpryse. Die organisasie sê brandstof lê aan die hart van enige ekonomie en daarom is dit van die uiterste belang dat pryse so laag as moontlik moet wees of ten minste nie kunsmatig hoog gehou moet word nie, om burgers in staat te stel om by die werk te kom en om dit moontlik te maak vir goedere en dienste om hul pad na burgers te vind.

Die vakbond Uasa het vantevore ook sy kommer oor die styging in brandstofpryse te kenne gegee – veral met verwysing na diegene op voetsoolvlak wat gewoonlik die swaarste getref word.

Die prys van brandstof het die afgelope jaar met sowat 40% gestyg, terwyl werkers minimaal klein of geen verhogings gekry het nie en onder toenemende geldelike druk verkeer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
Shakespeare

Wat ons die nodigste het is regerings hervorming.

Marius

Die staat kry miljarde met die brandstof heffings. Hul gee nie ‘n duit om vir die sukkelende bevolking nie.

Blikkies

Die brandstof raak nou al te duur vir my vrou om te gaan werk. Daar is geen alternatiewe vervoer werk toe nie en te ver om te loop. ‘n Kleiner karretjie kry jy ook nie. Een van die dae gaan sy moet betaal om te kan werk? Nog ‘n salaris trekker gaan moet bedank oor onregverdige hoë pryse.

Andre

Mantashe net nog n voorbeeld van die kennis wat ANC kaders het, net bietjie minder as n tuin slak

Swerwer

Die ANC kort geld. Dit is al hoekom die brandstof geteiken word.
Die ANC gee nie ‘n duit om oor enige iemand in hierdie land nie, solank hul sakke vol geld is en hulself rond en gesond is, kan die ander/res maar vergaan.