Huldeblyk aan Maclear-boer: Wêreld het meer soos hý nodig

“Vir ʼn 74-jarige man was my pa nog fiks en gesond. Hy was ʼn besige man en het nog aktief geboer. Daarom is sy dood vir ons baie swaar.”

Só vertel Craig Davidson oor sy pa, Francis Davidson, wat Dinsdag in die hospitaal dood is, sowat ʼn maand nadat hy lank op sy plaas in die distrik Nqanqarhu (Maclear) aangehou en gemartel is.

Volgens Craig het sy pa nog daagliks te voet of te perd teen die berge opgegaan waar hy ʼn stuk veld gehuur en waar ʼn paar van sy beeste gewei het.

Davidson was nie bang om op sy oudag sy hande vuil te maak nie en het graag trekkers en landbou-werktuie reggemaak. Hy het as stokperdjie ook graag outydse trekkers herstel.

“Daar lê nog ʼn trekker se enjin op die plaaswerf waaraan hy besig was om te werk.”

Hy het ook vir boere in die omgewing planters en spuite gekalibreer en het die afgelope jaar op ʼn enkele dag 300 skaap vir ʼn projek help doseer.

“Hy was nie ʼn welgestelde man nie en het van die hand tot die mond geleef deur die geld wat hy vir loswerkies gekry het. Maar hy was ʼn baie hardwerkende man.”

Drie mans het Davidson op 26 April op sy plaas oorrompel, hom erg aangerand en gemartel. Die boer het erge kopbeserings tydens die aanval opgedoen en moes twee breinoperasies ondergaan. Hy het ook massiewe spiertrauma en brandwonde opgedoen.

Davidson se familie het einde Mei aan Maroela Media gesê hy sukkel nog met kognitiewe vaardighede en was fisiek uiters verswak. Hy het nie meer sy eie naam onthou nie en ook nie sy familie herken nie.

Dit is vir die familie moeilik om te aanvaar dat Francis op só ʼn wrede manier van hulle weggeneem is.

“Hy het nog lus vir die lewe gehad en dit is van hom gesteel.”

Davidson en sy vrou, Heather, het ʼn gelukkige lewe op die plaas gehad en hy was ʼn geliefde boer in die Oos-Kaap, vertel sy seun.

“Hy het geen vyande gehad nie. Hy was baie vriendelik en het nie gou kwaad geraak nie. Hy het graag gelag – die lagplooie op sy gesig getuig daarvan.

“Hy het ook altyd tyd gehad om ʼn geselsie met enigiemand aan te knoop – van die veewagter tot die hond.”

Daar is nog nie ʼn datum vir Davidson se roudiens bepaal nie omdat die nadoodse ondersoek nog nie afgehandel is nie.

Glen Velleman, Heather se seun, skryf op Facebook dat Davidson dankbaar vir die klein dinge in die lewe was.

“Ons sal altyd jou stories onthou wat jy met soveel passie vertel het. Die wêreld het meer van jou sagmoedige menswees en karakter nodig,” skryf Velleman.

Francis se dogter, Tara Davidson, skryf sy is dankbaar dat sy haar pa se hande die laaste paar weke kon vashou en vir hom kon sê hoe lief sy vir hom is.

Yamkela Fanaphi, Thembelani Mazibuko en Andile Dyani sal Dinsdag in die landdroshof op Nqanqarhu verskyn wanneer ʼn klag van moord by die klagstaat gevoeg sal word.

Fanaphi het deeltyds as plaaswerker vir Davidson op die plaas gewerk.

Craig het tot dusver elke hofsaak bygewoon.