Kameelperd vrek ná noodlottige kopstamp op PTA-snelweg

Foto: Thinus Botha.

Die foto is etlike sekondes geneem voor een van dié kameelperde se kop die oorhoofse Garsfontein-brug getref het. Foto: Thinus Botha.

ʼn Kameelperd is Donderdagmiddag dood toe sy kop ʼn brug op die N1-snelweg in Pretoria getref het terwyl hy op ʼn oop wa vervoer is.

Thinus Botha, ʼn 32-jarige ingenieur wat die voorval uit sy motor aanskou het, het aan Maroela Media gesê hy het die vragmotor, wat twee kameelperde vervoer het, van die John Vorster-afrit in Centurion gevolg. Hy het naby die Garsfonteinweg-brug omstreeks 14:30 ʼn foto van die vragmotor geneem en sekondes later gesien hoe een van die twee kameelperde se kop die oorbrug tref.

“Dit was ʼn harde slag,” het Botha gesê. “Kort daarna het ek sien hoe sy nek knak en daar het bloed by sy snoet uitgeloop.”

Botha het gesê verskeie motoriste het hul toeter gedruk vir die vragmotorbestuurder om sy aandag te trek. Botha het egter by die Atterburyweg-afrit die snelweg verlaat en net gesien hoe die vragmotor in die middelste baan voortbeweeg.

Die vragmotor het uiteindelik naby die tolhek in die noorde van Pretoria van die pad afgetrek, waar die dierebeskermingsvereniging (DBV) die diere ondersoek het.

Rick Allen, ʼn woordvoerder van die Tshwane-DBV, het aan Maroela Media gesê die departement van natuurbewaring het glo ʼn permit toegestaan dat die betrokke kameelperde en ander vee vervoer mag word. Hulle was glo op pad na ʼn plaas in die Bela-Bela (Warmbad)-omgewing.

“Ons is glad nie tevrede met die manier waarop die kameelperde vervoer is nie,” het Allen gesê. “Hulle moes in ʼn wa met ʼn dak vervoer word.”

Beamptes van die DBV ondersoek die voorval en is nog op die toneel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
RIA

wie kan so vertraag wees hulle kan mos dink hell nee man

RIA

wie kan so vertraag wees hulle kan mos dink hell nee man

Pieter Myburgh

ONNOSEL DOM,ALMAL WAT BETROKKE WAS,ORGANISEERDERS TOT DIE BESTUURDER !!!!!!!!

Amanda

Ai dit is so hartseer. :'( Arme diere. Ek hoop hulle word vervolg vir die onverantwoordelike manier van vervoer.

Trippie

Mens het lus en huil vir die arme dier se part – en sommer ‘n paar taaiklappe uitdeel aan die persoon/persone wat nie die nodige voorsorg getref het nie.