Kerk loop ook deur onder betogers

Die Nederduits-Hervormde Kerk Wesmoot (Foto: Verskaf)

Chaos heers sedert Dinsdag vroegoggend in die Hercules-omgewing in Pretoria-Wes nadat minstens 500 inwoners van die Gomorrah- informele nedersetting in groot getalle die strate ingevaar het.

Betogers het buitebande in die strate gebrand en klippe na die publiek gegooi. Die Nederduitsch Hervormde Kerk Wesmoot se vensters is met klippe stukkend gegooi en die heinings van die kerk afgeruk. Sommige inwoners was in hul huise vasgekeer en is deur die polisie se eenheid vir openbare orde uit hul huise na veiligheid gebring.

Boonop sit inwoners al twee dae sonder krag nadat die betogers ’n kragstasie aan die brand gesteek het.

Die plaaslike gemeenskapspolisiëringsforum (GPF) van Hercules was verplig om van die strate wat deur die betogings geraak word, te sluit en verkeer te herlei. Die polisie, plaaslike sekerheidsmaatskappye en die metropolisie was ook op die toneel.

Die protesaksie volg omdat inwoners van hierdie nedersetting vies is oor die plaaslike munisipaliteit se swak dienslewering.

Jan Prinsloo, skakelbeampte van die Hercules GPF, sê die betogings het Dinsdag omstreeks 03:00 begin en duur steeds voort. Hy sê die betogers dreig om nog tot eerskomende Vrydag te betoog.

Die betogings vind in die omgewing van Van der Hoff-weg en die Mahem-gebied plaas.

“Die inwoners vaar in massas die strate in. Hulle groepeer en hergroepeer die heeltyd,” sê Prinsloo.

Volgens Prinsloo is die betogers redelik aggressief en rig groot skade in die gemeenskap aan.

Prinsloo het veral sy misnoeë uitgespreek oor die skade wat hulle aan die kerk aangerig het. Hy is ’n ouderling in dié kerk.

“Die betogers het die kerk se ruite met klippe gebreek. Hulle het ook in die laatnagure die heinings van die kerk afgeruk. Watter tipe mens plunder die huis van God?”

Dié kerk het in 11 April 2019 reeds groot skade weens protesaksie gely en dit het die gemeente honderdduisende rand gekos om die gebou weer tot sy volle glorie te herstel.

Prinsloo sê die betogers het ook ’n sekerheidsfirma wat oorkant die kerk geleë is, geplunder.

Volgens bevestigde berigte het die betogers ook die Simba-fabriek en ’n herwinningswerf in die omgewing geteiken en beskadig.

“’n Bejaarde man is ontvoer en aangerand en die GPF het hom opgespoor en seker gemaak hy kry die nodige mediese behandeling.”

Prinsloo sê die gemeenskap is ook raadop oor die kragonderbreking wat hulle tans ervaar. “Die munisipale raad wat vir die kragstasie verantwoordelik is, trek net hul skouers op oor die situasie, want volgens hulle kan hulle nie die stasie herstel terwyl daar betogings in die omgewing is nie.”

Volgens Kobus Hoffman, VF Plus-lid van die Gautengse wetgewer, was hy, Grandi Theunissen, VF Plus-raadslid en burgemeesterskomiteelid vir gemeenskapsveiligheid in die Tshwane-metroraad, en Morné Erasmus, VF Plus-raadslid, van Dinsdagoggend tot laatnag op die toneel om gemoedere tot bedaring te probeer bring.

Hoffman en Theunissen is albei met klippe bestook.

Die party het lt.genl. Elias Mawela, die Gautengse provinsiale polisiekommissaris, versoek om versterkings uit aangrensende gebiede na die brandpunt te stuur.

Hulle eis ook dat Lebogang Maile, LUR vir samewerkende regering en tradisionele sake (Cogta), Gomorrah self besoek om aan die inwoners te verduidelik waarom die beloftes oor behuising en dienste nog nie nagekom is nie.