Klag by MRK ingedien ná LUR glo wittes beledig

Mathabo Leeto, die Vrystaatse LUR vir sport, kuns, kultuur en ontspanning. Foto: artsculturesa.wordpress.com

ʼn Klag is teen Mathabo Leeto, die Vrystaatse LUR vir sport, kuns, kultuur en ontspanning, by die Menseregtekommissie (MRK) ingedien nadat Leeto glo tydens ʼn sitting van die provinsiale wetgewer na wit Suid-Afrikaners as “verkragters” verwys het.

In die klagte wat deur Jan Bosman, hoofsekretaris van die Afrikanerbond, by die MRK ingedien is, sê Bosman dié omstrede uitlatings is ʼn ernstige rasse-aanval op die integriteit van wit Suid-Afrikaners. “Dit is ongegrond, onnodig en sonder enige staankrag. [Leeto] skuld op die minste alle wit Suid-Afrikaners, mans en vroue, ʼn onvoorwaardelike verskoning,” het Bosman gesê.

“Hierdie ongevraagde en veralgemeende bewerings van LUR Leeto is uiters skadelik vir ʼn samelewing wat reeds diep verdeeld is. Haar uitlatings het ʼn diepliggende rassistiese motivering en beskuldiging. Daarom wil ons hiermee ʼn formele klag by die Mensregtekommissie indien.”

Bosman het verder daarop gewys hoewel die reg tot vryheid van spraak deur die Grondwet beskerm word, kan hierdie vryheid van spraak nie gebruik word om haat aan te hits gebaseer op ras en etnisiteit nie. “Ons glo dat LUR Leeto met hierdie uitlatings rasgebaseerde haat aangehits het met spesifieke verwysing na artikel 16(2)(c) van die Handves van Menseregte.”

ʼn Afskrif van die klagte is ook aan die presidensie en die ANC gestuur.

Maroela Media het vroeër berig Leeto het die omstrede uitlatings glo gemaak kort nadat ʼn debat oor Vrouedag in die wetgewer begin het. Mariette Pittaway, ʼn DA-lid van die Vrystaatse wetgewer, beweer Leeto het gesê wit mense is verkragters “so ver terug as toe Jan van Riebeeck in die land aangekom het”. Volgens Pittaway het Leeto verder gesê wit mense se grafte moet opgegrawe word “sodat hul lyke kan rekenskap gee”.

Haar beweerde uitlatings het opslae veroorsaak met talle wat kritiek teenoor haar stellings uitgespreek het.

Bosman het gesê die Afrikanerbond is baie bekommerd dat die Suid-Afrikaanse samelewing in ʼn afwaartse spiraal is wat rasseverhoudinge betref. Hy het gesê indien Suid-Afrika hom daarop wil roem dat hy nie-rassige demokrasie handhaaf, moet daar ernstige introspeksie gedoen word oor uitlatings wat deur Suid-Afrikaners, politici en staatsamptenare in die openbaar gemaak word.

Life Mokone, woordvoerder van die Vrystaatse wetgewer, het sedert Dinsdag nog nie op Maroela Media se navrae om kommentaar gereageer nie. Mokone het wel ontvangs van Maroela Media se versoek om kommentaar erken en gesê die wetgewer sal “met verloop van tyd” reageer.

ʼn Woordvoerder van die MRK kon nie onmiddellik bevestig hoeveel klagtes die kommissie in die verband ontvang het nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Tronk toe

Sy hoort agter tralies

Apie

Sy hoort agter tralies, maar nou ja, swartmense kan mos nie rassisties wees nie!

Haat

Sy verkondig haar haat oop en bloot.

A

Was dit ‘n wit persoon wat so iets kwyt geraak het was hy al agter tralies

John

En WaarNet le daagliks windeiers oor glo slegte wittes maar Afrikaners sit en glimlag saam oor die beswaddering… Te oulik.