Majoor afgedank oor Facebook-uitlating

Majoor MV Mohlala. Foto: Via Facebook

Maj. MV Mohlala, die man wat vroeër vanjaar op Facebook in reaksie op ʼn gewelddadige aanval op wit bejaardes onder meer gesê het dat die aanvallers ʼn slagoffer se oë en tong ook moes uitsteek, is afgedank.

Brig.genl. Mafi Mgobozi, woordvoerder van die Suid-Afrikaanse Nasionale Weermag (SANW), het die nuus Dinsdagoggend aan Maroela Media bevestig.

“Daar was ʼn lang proses van hersiening in oorleg met die minister van verdediging en daar is bevind dat dit ʼn baie ernstige oortreding was. Die besluit is op haar aanbeveling hersien en hy is verlede week afgedank,” het Mgobozi gesê.

Volgens Mgobozi is Mohlala se afdanking finaal en permanent.

Maroela Media het vroeër berig Johan van Wyk, ds. Braam van Wyk (80) se seun, het op 10 Maart ʼn foto van sy pa se erg aangerande gesig op Facebook gedeel ná ʼn aanval vroeër die dag in Ysterhoutweg in Randparkrif in Randburg. Van Wyk het op Facebook geskryf: “Watter lafaards skop ʼn 80-jarige man in sy gesig terwyl sy hande agter sy rug vasgebind is? Hulle het ook sy vriend, afgetrede prof. Kobus Naude wat ʼn wonderlike man was, vermoor deur hom met ʼn mes in sy hart te steek.”

Mohlala, destyds verbonde aan die Wonderboom- militêre basis, het in reaksie op Van Wyk se plasing die aanvallers se optrede goedgekeur. Op sy Facebook-profielfoto wat by die inskrywing verskyn het, sit hy in sy weermaguniform met sy naam op ʼn plaatjie op sy bors aangebring.

“Die aanvallers moes sy oë en tong uitgesteek het sodat die laaste gesigte wat hy ooit sou sien, dié van die moordenaars sou wees en hy na sy graf kon gaan met die nagmerrie,” lui die beweerde inskrywing wat sedertdien verwyder is.

Die plasing wat Johan gemaak het.

Hy het glo ook gesê: “Apartheid is in hom [Braam]. Al hierdie ou wit mense dink ons is onnosel as hulle sê hulle was teen apartheid gekant. Ons sal nie vergeet wat hulle gedoen het nie. Nou is dit die wit mense se beurt.”

Mgobozi het aanvanklik gesê Mohlala is net berispe ná die inskrywing en gewaarsku om die plasing te verwyder en nie weer sulke uitlatings te maak nie, anders sal tugstappe gedoen word.

Ian Cameron, AfriForum se hoof van gemeenskapsveiligheid, het Dinsdag aan Maroela Media gesê dié besluit om wel verdere tugstappe teen Mohlala in te stel en hom af te dank is “fantasties”.

“AfriForum ervaar regtig dat daar ʼn dubbele standaard is waar swart mense sekere dinge kan sê wat neerhalend is teenoor minderheidsgroepe en wegkom daarmee. Dit is moontlik ʼn stap in die regte rigting dié hoewel daar nog baie werk is wat gedoen moet word,” het Cameron gesê.

Die nuus van Mohlala se uitlatings is in dieselfde week aangekondig waarin die eiendomsagent, Vicki Momberg, vir twee jaar tronk toe gestuur is omdat sy ʼn polisiebeampte rassistiese skeldname toegesnou het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

106 Kommentare

jongste oudste gewildste
Deserisé Cocklin-Viljoen

Dit is verblydende nuus.

AmY

Reg so!

al

Hy moet ook 2 jaar tronkstraf kry vir rassisme teen oor wit mense

AmY

Wat my egter bekommer, is dat hy in die weermag is/was, en dat hulle mos oor ál die landsburgers se veiligheid besorg moet wees. Of is ek nou verkeerd?

wraggies

Wonder waar gaan hy volgende opduik.