Malema aan Trump: ‘Los SA uit’

Julius Malema. Foto: Werner Beukes/SAPA

EFF-leier Julius Malema het Donderdag harde woorde vir Amerikaanse president Donald Trump gehad en hom gewaarsku om sy neus uit Suid-Afrika se plaaslike kwessies te hou.

Dit kom nadat Trump vroeg Donderdagoggend (Suid-Afrikaanse tyd) opspraak gewek het met ʼn twiet waarin hy sê dat hy opdrag gegee het dat Mike Pompeo, die Amerikaanse minister van buitelandse sake, die grondkwessie en plaasmoorde-krisis in Suid-Afrika ondersoek.

Malema het tydens ʼn mediakonferensie in Johannesburg aan verslaggewers gesê die Amerikaanse owerhede moenie met Suid-Afrika se nasionale sake inmeng nie aangesien Suid-Afrika nou die probleem van ongelykheid deur grondonteiening probeer aanraak.

“Ons wil ʼn duidelike boodskap aan die Amerikaanse owerhede stuur net soos ons met die Australiese regering gedoen het – hou julle uit Suid-Afrika se plaaslike sake. Suid-Afrika is ʼn post-koloniale land wat in ʼn greep van diepe ongelykheid is weens apartheid en kolonialisme. Grondonteiening het ten doel om gelykheid te skep en menswaardigheid te herstel. Deur grondonteiening sal ons wittes dwing om die grond te deel wat bekom is deur misdaad teen die mensdom,” het Malema gesê.

“Donald, ons is nie bang vir jou en jou Amerikaanse en Westerse imperialistiese magte nie. Ons is nie die generasie wat gaan kniel by die standbeeld van Westerse imperialisme en net aanvaar om met die vernedering van swartes wat grondloos is te leef nie.”

Malema het toe ook na pres. Cyril Ramaphosa en “sy groep” binne die ANC gekap en gesê hulle is nie eerlik oor hul werklike siening van grondhervorming nie. Hy het gesê Ramaphosa en sy ondersteuners in die SAKP glo nie aan grondhervorming of grondonteiening sonder vergoeding nie, net soos die burgerregte-organisasie AfriForum.

Pres. Donald Trump se twiet.

“Ons vermoede is dat die DA en Cyril en sy groep in die ANC betrokke is by hierdie ding. Hulle glo nie aan grondonteiening nie, so hulle wil hierdie soort dreigemente gebruik om uit hierdie kwessie te kom. Ons kan nie so om die bos gelei word nie, ons is nie kinders nie.”

Malema het Gwede Mantashe en Pravin Gordhan by name genoem as deel van “die groep” wat nie werklik ten gunste van grondonteiening is nie en dus volgens hom dieselfde sienings deel as AfriForum. “Die goeie ding met AfriForum is dat hulle dit openlik doen, hulle kruip nie weg nie. Cyril se groep en die DA het alles in hul vermoë gedoen om internasionale steun te werf sodat daar konflik ontwikkel oor hierdie kwessie,” het hy gesê.

“Na my mening dra Donald Trump nou ook by tot die voortgesette debat, maar hy sê niks wat ons nog nie van wit mense gehoor het tydens die openbare verhore oor die wysiging van die Grondwet nie.”

Maroela Media het vroeër berig Lindiwe Sisulu, minister van internasionale betrekkinge en samewerking, het haar ook uitgespreek teen Trump se twiet en gesê die departement het versoek om met die Amerikaanse ambassade in Pretoria te vergader om duidelikheid oor die aangeleentheid te kry.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

116 Kommentare

jongste oudste gewildste
Anoniem

Bang die waarheid kom uit die opsweper !!!!!!!!

Al

Ñ Nar met baie vyande. Sy doelwit is om president te word en soos Robert Mugabe te regeer.
Mugabe se mini-me.

Tina

MAr dit is ok dat EFF advokate in Zimbabwe gaan inmeng? Laat Trump kom, ons verwelkom sy insette!

Johann cb

Ons het alle hulp wat ons kan kry nodig, Mnr Malema!

Andries

Dink hy kan met en van almal praat soos jy wil!!! Hoop Trump los dit nie daar nie!