Man op wildsplaas verskeur: Nuwe verwikkelinge

Argieffoto: Designerpoint, Pixabay

Die man wie se verskeurde liggaam Vrydagaand op ʼn wildsplaas in die Hoedspruit-omgewing in Limpopo gevind is, is toe nie ʼn plaaswerker soos die polisie aanvanklik vermoed het nie.

Lt.kol. Moatshé Ngoepe, provinsiale polisiewoordvoerder, het gesê daar is aanvanklik gedink die oorledene was ʼn werker op die plaas wat met ʼn trekker na sy blyplek gery het toe die trekker ʼn paar meter voor sy eindbestemming vasgeval het. Daar is vermoed hy het te voet verder geloop, waarna ʼn trop leeus hom oorval en verskeur het.

“Net die helfte van ʼn liggaam is opgespoor,” het Ngoepe gesê.

Volgens Ngoepe het verdere ondersoek aan die lig gebring dit was nie die trekkerbestuur wat verskeur is nie.

“Die plaaswerker is ongedeerd gevind. Die polisie ondersoek die moontlikheid dat die man dalk ʼn stroper was aangesien ʼn jaggeweer in die omgewing van die toneel gevind is.”

Ngoepe het gesê die proses om die identiteit van die vermeende stroper vas te stel het begin. “Sy kop is deel van die oorskot wat op die toneel gevind is en sal gebruik word in die geregtelike doodsondersoek.”

Ngoepe het ʼn beroep op die publiek gedoen wat ʼn familielid vermis en wat die oorledene kan uitken, om die Hoedspruit-polisie te bel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Wilmarie

As dit wel n stroper was, sal hy defnitief nooit weer kan stroop nie! Daar het jy dit nou van jou skelm wees!

Rooi Jan

Kan nie dink aan n beter uitkoms as dit toe wel n stroper was is.

Anti Stroper

Ek hou van die foto van die leeu.
Leeus 1 en wilddief 0.

PJC

Mag alle stropers hulle rieme styf loop.

HPV

Die stroper word toe gestroop, koning leeu se trofee! Die wet van die natuur.