Naam bekend van boer wat deur polisie doodgeskiet is

plaas-polisie-veld

Argieffoto

Die polisie het die naam van die bejaarde boer bekend gemaak wat Maandag op sy kleinhoewe noord van Bergville deur polisiebeamptes doodgeskiet is.

Brig. Jay Naicker, provinsiale polisiewoordvoerder van KwaZulu-Natal, het die man as Johannes Potgieter (80) geïdentifiseer nadat hy Woensdag deur sy naasbestaandes uitgeken is.

Maroela Media het Maandag berig die voorval het omstreeks 11:00 op Potgieter se kleinhoewe in die Geluksburg-omgewing plaasgevind.

“Die bejaarde man het glo ʼn 44-jarige man in die gesig geskiet toe hy die oorledene se kleinhoewe betree het om sy bokke te gaan haal,” het Naicker gesê.

Naicker het gesê dit is nog onduidelik of die slagoffer se bokke onwettig geskut was of self na die kleinhoewe geloop het. “Die voorlopige ondersoek dui daarop dat die man sy bokke bymekaargemaak het en op pad uit was toe daar by die hek ʼn argument tussen die twee mans ontstaan het. Dit is toe dat die bejaarde die ander man in die gesig geskiet het.”

Die man wat geskiet is, het na ʼn nabygeleë winkel gehardloop en hulp ontbied.

Die polisie het by Potgieter se huis opgedaag, waar hy hom glo teen inhegtenisneming verset het.

Volgens Naicker het die polisiebeamptes en gyselaarsonderhandelaars hom genader om hom te versoek om oor te gee toe hy op hulle geskiet het. Die beamptes het teruggeskiet en Potgieter noodlottig gewond.

Moses Dlamini, Opod se nasionale woordvoerder, het gesê die 44-jarige man het glo toestemming van Potgieter gevra voordat hy sy bokke probeer verwyder het.

Dit is nog nie duidelik wat tot die rusie by die hek gelei het nie.

“Die 80-jarige man het sy vuurwapen op die polisie gerig en een skoot gevuur. ʼn Voorlopige ondersoek dui daarop dat die beamptes hulself moes verdedig. Alle moontlikhede word egter nog ondersoek en verklarings word nog van verskeie mense geneem,” het Dlamini Vrydag aan Maroela Media gesê.

Opod se ondersoek duur voort. Niemand is nog in verband met die voorval in hegtenis geneem nie.

Die polisie ondersoek ʼn saak van poging tot moord.

Die 44-jarige man ontvang nog mediese behandeling in ʼn hospitaal.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

70 Kommentare

jongste oudste gewildste
Nico

Ek ruik n rot!!!!!Iets tel nie hier op nie.

Francois le Cochon

Niemand sal ooit weet of Johannes Potgieter wel ‘n skoot afgevuur het nie na die Polisie.

Chrisi

Dis nou interresant!!! Die polisie moet hulle self verdedig teen n 80jarige boer…maar die betogers wat plunder en te kere gaan kom niks oor nie!!! Maak my siek!!!!

Buitelandse vervolging

Ons moet hulp van die buiteland kry oor ons regte en om ons te beskerm wand die gefabriseerde aanvalle deur die staat ondersteun gaan almeer algemeen word.

Anoniem

Maar net weereens ‘n bewys dat daar ‘n paar stelle reëls bestaan ! So terloops die persoon is oorlede en dié saak sal ‘n stille dood sterf en iemand gaan skotvry kom ! Maar hy sal voor God moet verantwoording doen ?