Ninow-vonnis wyd verwelkom

Nicholas Ninow in die hof. (Foto: Mia Spies/eNuus)

Die lewenslange vonnis wat die hooggereghof in Pretoria die veroordeelde kinderverkragter Nicholas Ninow opgelê het, is Donderdag uit verskeie oorde verwelkom.

Benewens die vonnis vir die verkragting van die sewejarige dogtertjie verlede jaar, het regter Mokhine Mosope Ninow ook vyf jaar tronkstraf opgelê vir die besit van onwettige middels, asook vyf jaar tronkstraf vir dwarsboming van die gereg. Laasgenoemde vonnis word gelyklopend met die vonnis vir verkragting uitgedien.

Die 21-jarige Ninow het skuldig gepleit op die klag dat hy die kind verlede jaar in die badkamer van ʼn restaurant in Pretoria verkrag het.

Mense in die openbare galery het hande geklap, gesing en gedans nadat Ninow gevonnis is. Sy familie het egter in trane uitgebars en Ninow is kort ná die uitspraak uit die hof weggeneem.

Die Gautengse portefeuljekomitee oor gemeenskapsveiligheid het die vonnis verwelkom.

“Die swaar straf moet gesien word as ʼn duidelike aanduiding dat Suid-Afrikaners voorvalle van seksuele misbruik nie langer duld nie, veral nie wanneer dit gepleeg word teen vroue, kinders en bejaardes – die mees weerloses in ons gemeenskap – nie,” het die komitee in ʼn verklaring gesê.

Die komitee het die span geloof wat aan die saak gewerk het.

“Die komitee doen ʼn beroep op die regbank om soortgelyke en swaarder strawwe op te lê aan diegene wat aan dié soort misdaad skuldig bevind word.”

Hy het ook sy simpatie met die slagoffertjie en haar familie betuig.

Die DA se nasionale woordvoerder, Refiloe Nt’sekhe, sê die party het deurlopend volgehou dat Ninow die swaarste moontlike straf opgelê moet word.

Die DA sê Suid-Afrikaanse vroue en kinders loop deur onder voorvalle van seksuele en geslagsgebaseerde geweld. “Hulle ly dikwels in stilte onder ʼn ongevoelige regering.”

Die party sê hy hoop Ninow se vonnis stuur ʼn duidelike boodskap aan diegene wat misdade teen vroue en kinders pleeg. “Hoewel die lewenslange vonnis nie die herinnering van die lyding wat sy moes deurmaak kan wegneem nie, hoop ons dat dit minstens ʼn mate van geregtigheid en afsluiting vir die familie bring,” het Nt’sekhe gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

81 Kommentare

jongste oudste gewildste
Johnny

Is lewenslange tronkstraf vir swart mense dan anders? hoeveel van die wat wit kinders en vroue verkrag en vermoor het loop weer buite rond.

GP

Sterkte aan die man en sy gesin.

chrisjan

Mmmm…..ek wonder maar net waar kom vergifnis in.

johan

Chrisjan, sal jy en die verkragter se naasbestaandes my vergewe as ek as ouer die verkragter uit woede en hartseer vermoor? My kind se lewe is vernietig.

humor

Die skuldige se naasbestaandes is geensins medepligtig aan sy dade nie, en hulle sal ewe eens lewenslank ly . Ek wil se daar moes darem ook aan hulle gedink gewees het en simpatie en sterkte toegewens gewees het