Nog ’n skool in Soshanguve brand

‘n Gedeelte van die skool het in puin gelê weens die brand (Foto: Panyaza Lesufi/Twitter)

Die Soshanguve High School in die noorde van Pretoria was Woensdag vroegoggend in vlamme gehul. Dit is die vierde skool in Soshanguve wat brand sedert die landwye afsondering op 26 Maart ingestel is.

Steve Mabona, woordvoerder van die departement van onderwys, het gesê die skoolhoof is vroeg die oggend deur ʼn lid van die gemeenskap in kennis gestel dat die skool brand. Hy het daarna na die skool gejaag. Die brandweerdiens en polisie was toe reeds op die toneel.

Die brand is etlike ure na hul aankoms op die toneel geblus.

Volgens Mabona het die blok met die administrasiekantore tot op die grond afgebrand. Die waarde van die verlies moet nog bepaal word. “Die dak het in daardie gedeelte van die skool heeltemal meegegee en alles is tot as verbrand. Al die waardevolle toerusting en meubels is ook daarmee heen,” sê Mabona.

Panyaza Lesufi, LUR van onderwys in Gauteng, is ontsteld omdat nog ʼn skool in dieselfde omgewing weens ʼn brand in die slag gebly het.

“Ons weet regtig nie wat in Soshanguve aangaan nie. Dit is kommerwekkend; dit lyk asof dieselfde modus operandi gebruik word. Dit wil vir ons voorkom asof daar ’n sindikaat in die gebied is. Hoe gouer hierdie lafaards vasgetrek word, hoe beter,” het Lesufi gesê.

Volgens Mabona het altesaam 22 skole reg oor Gauteng reeds onder inbrekers of vandale deurgeloop sedert die algehele landwye afsondering verlede maand ingestel is.

Die brandweer en polisie het ʼn ondersoek van stapel gestuur om vas te stel wat die brand kon veroorsaak het.

Lesufi gaan Donderdag die vier skole in Soshanguve wat in puin lê, besoek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Susan

Vir wat doen hulle dit? Wonder wat se di president van di spul as hy iets sal se more oormore kla hulle hulle kry ni onderrig ni daar is ni woorde ni rerig hulle brand af nog steeds na hoeveel jare di lockdown aan di eenkant di anderkant di virus dan panic koop hulle en en

Boortor

Hy wil die skole gaan besoek? Wat wil hy sien?? Ek dog ons moet nie onnodig rond ry nie. O ja.. dit is net ons wat nie mag buite kom nie. Hoop hy herbou die skool as hy klaar gesien het. Hy is nou daar.

Petrie

Watter 4 skolle is in Soshanguve afgebrand?

Andre

Hulle glo nog die slagspreuk: No education before liberation.

Gawie

Dis regtig tragies. Duidelik is daar elemente daarbuite wat hierdie toestand in die land uitbuit om kwaad te doen.