Noue ontkoming wyl Ford brand

Geskryf deur: Alet Engelbrecht en Elaine Krige

Die uitgebrande Ford Kuga langs die pad. (Foto: Verskaf)

ʼn Mosselbaaise ma is dankbaar sy en haar twee seuns leef nadat haar Ford Kuga verlede week op pad skool toe aan die brand geslaan het.

Jolene Smit was op die N2 op pad na Groot-Brakrivier waar haar twee seuns, Luke (8) en Joshua (6), in die skool is, toe daar rook by die voorkant van die motor begin uitkom. Kort nadat die drie uit die motor padgegee het, het ʼn klein ontploffing die windskerm gebreek en is die voorkant van die motor in vlamme verswelg.

“Dit spook elke oomblik van die dag by my dat ek en my kinders tydens die eerste ontploffing nog in die motor kon gewees het. Ek is emosioneel, huilerig en kan op niks konsentreer nie,” sê Smit.

Sy vertel dat sy altyd by die afdraande voor die Kleinbrak-oprit die motor uit rat haal en dan die enjin laat vryloop tot waar hulle die oprit neem. Dié oggend het die motor se batteryliggie egter aangegaan en sy kon die voertuig nie weer in rat kry nie.

Terwyl sy gesukkel het om die motor na die kant van die pad te stuur, het daar iets wat lyk soos stoom by die enjin uitgekom, wat haar laat dink het die motor is aan’t oorverhit. Sy het vir die kinders gesê hulle moet net ʼn rukkie wag voor sy weer die motor aanskakel. Die “stoom” het al hoe erger geraak en haar oudste seun het uit die motor geklim om te kyk wat aangaan.

“Hy het vlamme aan die kant van die voertuig sien uitkom en vir ons geskree dat die kar brand. Ek het toe besef dat die stoom al die tyd rook was. Ek het my handsak gegryp en ek en die kinders het wegbeweeg van die motor. Ons was seker so drie meter weg toe ons die eerste ontploffing hoor. ʼn Vrou in ʼn silwer Fortuner het by ons gestop en gesê die kinders moet inspring sodat sy hulle na veiligheid aan die ander kant van die oprit kon neem, weg van die toneel af.”

Smit vertel sy het onbedaarlik begin huil. “Ek was histeries, in skok.”

Veiligheidspersoneel van Hartland Estate waar sy werk, was oomblikke later op die toneel.

Albei Smit se broers, een uit George op pad na Mosselbaai en die ander uit Albertinië op pad na George, het toevallig verby die brandende motor gery en hul suster se voertuig herken.

“Hulle was baie geskok toe hulle sien dit is my motor wat brand. Ek was so dankbaar dat hulle daar was vir my en my kinders.”

Die uitgebrande Ford Kuga langs die pad. (Foto: Verskaf)

Mosselbaai se brand-, redding- en rampbestuursdienste was vinnig op die toneel en Smit is baie beïndruk met die wyse waarop hulle haar seuns hanteer en die situasie aan hulle verduidelik het.

Volgens Smit het die motor die afgelope sewe maande probleme gegee deurdat die temperatuurmeter gewys het die enjin oorverhit. Sy het die motor in Desember na ‘n Ford-handelaar geneem, en dié het gesê dit is haar waterpomp wat foutief is. Die waterpomp is vervang, maar ʼn paar weke later het die motor weer oorverhit en die waarskuwingslig op die motor se beheerpaneel het geflikker.

Tegnici kon egter nie ʼn probleem opspoor nie en die motor het nie oorverhit terwyl dit by die handelaar was nie. In Maart vanjaar het die motor dieselfde probleem gegee en die motor se vonkproppe is vervang. Die probleem het egter wéér ʼn paar weke later opgeduik en wéér kon tegnici niks fout vind nie.

Toe die motor twee weke vóór die insident weer tekens van oorverhitting toon, het tegnici aan Smit gesê die probleem lê by die sensor wat aandui hoeveel water in die motor is. In dié geval het die sensor aangedui die watertenk is leeg, terwyl dit glad nie die geval was nie.

“Hulle het vir my gesê dit is ʼn elektroniese fout en sou R19 000 kos om te vervang. Ek is onder die indruk gebring dat dit nie ʼn ernstige probleem is nie, aangesien ek net self die watervlakke in die motor moes monitor. Ek het toe besluit om nie die fout te laat herstel nie. Twee weke later het die motor gebrand.”

Ford SA se woordvoerder het aan Maroela Media gesê hulle is bewus van die voorval en het bevestig dat die eienaar van die motor twee weke voor die voorval die Ford-handelaar in Mosselbaai besoek het, weens kommer oor die werking van die motor.

“Die handelaar het ʼn kwotasie uitgereik vir noodsaaklike herstelwerk aan die motorenjin, maar die kliënt het die kwotasie van die hand gewys.”

Ford beweer ook dat die betrokke voertuig meer as 200 000 km op die klok het en laas op 80 000 km by ‘n Ford handelaar versien is. Smit sê egter die motor word gereeld versien.

Ford moes in 2019 miljoene rande opdok nadat altesaam 56 Kugas tussen 2015 en 2017 aan die brand geslaan het. Ford het altesaam 4 500 motors herroep. Die motors wat herroep is, is die Ford Ecoboost, 1.6 L wat tussen 2012 en 2014 in Spanje vervaardig is. Smit se motor is dieselfde model.