Premier kap regulasies na klagtes oor besige promenade

Foto: @MolotoMothapo/Twitter

Die nuwe vlak 4-regulasies het hoë vlakke van samedromming in sekere openbare ruimtes tot gevolg, maar volgens die premier van die Wes-Kaap is dit omdat dié regulasies nie deurdink is nie en ʼn gebrek aan gesonde verstand toon.

Premier Alan Winde het gereageer nadat daar veral op sosiale media klagtes was oor die aantal mense wat op die Seepunt-promenade oefen. Foto’s is geplaas van groot groepe mense wat verby mekaar stap, hardloop en fietsry. Daar is ook gekla oor mense wat nie maskers aangehad het nie.

Die nuwe vlak 4-regulasies maak voorsiening vir mense om tussen 06:00 en 09:00 te oefen in ʼn radius van 5 km van hul huise af. Volgens Winde het inwoners van die Wes-Kaap nes inwoners in die res van die land van die geleentheid gebruik gemaak, maar het die voldoening aan die regulasies in ʼn baie eng vasgestelde tyd hoë vlakke van samedromming tot gevolg gehad.

“Dit is die ongelukkige gevolg van regulasies wat nie deurdink is nie en ongelukkig ʼn gebrek aan gesonde verstand toon. Die mediese en wetenskaplike redes vir die afsondering was om samedromming te beperk om die verspreiding van Covid-19 te vertraag. Deur inwoners te dwing om slegs gedurende ’n baie spesifieke tyd te oefen, veroorsaak ons samedromming.”

Alan Winde. Foto: Courtney Africa/African News Agency(ANA)

Daar is volgens Winde ook nie oorweging gegee aan die feit dat sonsopkoms veel later in die Wes-Kaap is nie, wat beteken dat die tydperk wat mense kan gaan oefen nog kleiner is.

“Die Wes-Kaapse regering sal dus die minister versoek om voorsiening te maak vir bykomende tye vir oefening tydens dagligure, sodat ons die aantal mense wat op enige stadium oefen, drasties kan verminder.”

Volgens Winde speel kardiovaskulêre oefening ’n belangrike rol in ’n gesonde leefstyl, wat ook ’n positiewe invloed op longgesondheid het. “Ons moet gesonde leefstylkeuses aanmoedig en inwoners van die Wes-Kaap toelaat om verantwoordelikheid vir hulself te neem deur sosiale distansiëring te beoefen en hul maskers te dra terwyl hulle oefen.”

Winde het inwoners versoek om alles in hul vermoë te doen om samedromming te vermy. “Hou ʼn afstand van ander en oefen alleen. Jy moet ’n lapmasker dra en te alle tye die reëls rakende goeie higiëne volg. As jy nie goed voel nie, moet jy glad nie jou huis verlaat nie.”

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

26 Kommentare

jongste oudste gewildste
Lizanda

Wat het hulle verwag, dis normaal, menslik en verstaanbaar as jy vir 5 weke in ‘n woonstel, meenthuis of self ‘n huis gesit het om te gaan draf, stap ens, die regering het die regulasie bepaal dat die aktiwiteite net tussen 6 en 9:00 plaasvind, niemand ander nie!!!! Nou wat nou!!!!Moet ons nou nog pa staan daarvoor ook!!!!

Termiet

Geen gesonde verstand tussen hulle almal nie.

Jannie van Niekerk

Die kritiek kom seker weer van ‘n spul oorgewig ANC ondersteuners af wat net wil vreet op belastingbetalers se onkoste en nie wil oefen om gesond te bly nie.

Boortor

Ha ha ha! Hulle huisarres het die teenoorgestelde uitwerking! Breinloos, absoluut breinloos. Onthou…elke reaksie het n teen reaksie. Soos bv. burgerlike ongehoorsaamheid wat klaar mooi kop uitsteek.

Johanncb

Maak die hele dag “oop” van 6vm tot 8nm! Dan sal daar géén opeenhoping wees nie! Nogal logies!