Pta-leerder kritiek beseer in voorval by skoolkamp

Carmen Botha. Foto: Verskaf

Carmen Botha. Foto: Verskaf

ʼn Dertienjarige meisie van Centurion veg om haar lewe in die waakeenheid van ʼn Johannesburgse hospitaal nadat sy 15 meter ver tydens ʼn skoolkamp geval het.

Carmen Botha, ʼn gr. 8-leerder, is Donderdag in ʼn kritieke toestand na die hospitaal gehaas nadat sy 15 meter ver van ʼn glykabel (foefie slide) geval het. Carmen was ten tyde van die voorval saam met haar klasmaats op ʼn skoolkamp by ʼn avontuursentrum buite Brits in Noordwes. Dit is in dié stadium nie duidelik wat die fratsongeluk veroorsaak het nie, maar die voorval word tans ondersoek.

Gerna, Carmen se ma, het aan Maroela Media gesê paramedici was vinnig op die toneel om Carmen te stabiliseer en per helikopter na Johannesburg te vervoer. Desondanks het Carmen se hart op pad na die hospitaal gaan staan weens haar erge inwendige beserings.

“Ek kan nie eens vir jou beskryf hoe dit gevoel het toe die helikopterdeure oopgaan en ek sien hulle is besig met hartmassering nie,” het Gerna gesê. “Ek wens dit nie vir my grootste vyand toe nie.”

Carmen se lewer en milt is geskeur, van haar ribbes het gebreek en deur haar long gesteek, twee van haar werwels is gebreek, ʼn bloedvat in haar dermkanaal het geskeur en sy het ʼn haarlynfraktuur op haar skedel opgedoen. Sy het wonderbaarlik egter geen breinskade of bloeding op haar brein opgedoen nie.

Carmen is onmiddellik vir ʼn noodoperasie geneem om die inwendige bloeding te stop en haar milt te verwyder. Sy het kort daarna ʼn tweede operasie ondergaan om van die inwendige skade te herstel en was Sondag weer op die operasietafel om haar buik finaal toe te werk. Volgens Gerna moes Carmen omtrent 20 liter bloed in die eerste 36 uur ná die ongeluk ontvang.

“Sy is tans aan ʼn masjien gekoppel wat haar hart en longe se funksies oorneem sodat haar organe kan rus en herstel,” het Gerna gesê. “Sy is ook nog aan ʼn asemhalingsmasjien verbind, maar die dokters sal deur die loop van vandag [Maandag] stelselmatig haar verdowing verminder om haar uit die geïnduseerde koma te bring, waarna sy waarskynlik van die asemhalingsmasjien verwyder sal word.” Sy het ook nierversaking opgedoen weens haar beserings.

Volgens Gerna is dit nie in hierdie stadium duidelik wat die langtermyngevolge van Carmen se gebreekte werwels gaan wees nie. Hulle weet net dat sy nog maande in die hospitaal sal moet deurbring.

“Volgens die dokters is iemand wie se hart gaan staan het weens sulke erge inwendige bloeding as gevolg van die trauma se kans op oorlewing 0,5%. So, as dít nie ʼn wonderwerk is nie, dan weet ek nie wát is een nie,” het Gerna gesê.

“Carmen het letterlik vir elke liggaamsdeel wat beseer is ʼn dokter wat daarna omsien. Die personeel by die hospitaal is net so ongelooflik en ondersteun ons op so ’n onbeskryflik wonderlike manier. Ons is so dankbaar vir hulle,” het sy gesê. “Ons weet daar is so baie mense wat vir Carmen bid en ons kan nie vir elkeen van hulle dankie sê nie. Maar hulle dra ons beslis deur hierdie tyd.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

60 Kommentare

jongste oudste gewildste
Gebed

My gebed is vir julle volkome genesing, berusting en hoop elke dag. Ek weet Jesus sal julle dra. Spoedige beterskap, Carmen!

Boesman

Sterkte!

Mirinda

Here beskerm en bewaar asb hierdi kind, baie sterkte aan die ouers!

Wendy

Pappa Jesus bewaar carmen in die holte van U hand. Here U het ons geskape net U kan ons volkome genees! Pappa Jesus dankie vir n wonderwerk! Amen.

Jacqueline

Here U is ‘n God van wonderwerke. U is die Groot Geneesheer van alle tye. Here ons sê nou dankie wat U sover vir Carmen gedoen het en dankie dat ons U net kan loof en prys vir wat U nog gaan doen. Al die lof en eer aan U.