Regstappe oor Kubaanse ingenieurs gaan voort

Lindiwe Sisulu, minister van menslike nedersettings, water en sanitasie. (Foto: GCIS)

Solidariteit het ʼn “robuuste” gesprek met die minister van menslike nedersetting, water en sanitasie gehad oor die sogenaamde invoer van Kubaanse ingenieurs om Suid-Afrika met sy waterprobleme te help, maar die regsproses om die besluit te betwis gaan voort.

Die organisasie het Maandag met min. Lindiwe Sisulu oor die omstrede besluit vergader.

Dr. Dirk Hermann, bestuurshoof van Solidariteit, sê hoewel die regstappe nie opgeskort is nie, die minister se span teen Woensdag om 16:30 ʼn voorstel sal maak om die dispuut te probeer ontlont.

“Die voorstel sal fokus op ʼn ooreenkoms om die private sektor by infrastruktuurprojekte te betrek,” sê Hermann.

Solidariteit hou voet by stuk daar is geen regverdiging om Kubaanse kundiges in te voer terwyl Suid-Afrikaners beskikbaar is om die werk te doen nie.

“Die kern van die probleem is ʼn algehele gebrek aan respek vir vaardighede en die private sektor in Suid-Afrika,” sê Hermann.

Sisulu het vroeër uitgevaar teen kritiek oor die besluit om Kubaanse ingenieurs te gebruik om Suid-Afrika met sy waterkrisis te help. Sy het toe gesê die Kubane is nie hier vir indiensneming nie, maar om munisipale amptenare te mentor sodat werk geskep kan word.

Die koste van die 24 Kubaanse ingenieurs beloop sowat R65 miljoen – en dít terwyl Kuba self probleme met sy waterinfrastruktuur ondervind.

Hermann sê Solidariteit voer aan daar is geen rasionele rede om die Kubane ten duurste die land in te bring nie en dat só ʼn besluit boonop nie ʼn rasionaliteitstoets in ʼn hof sal slaag nie.

Solidariteit voer voorts aan dat die Kubane nie voldoen aan die nodige plaaslike vereistes vir registrasie en lisensiëring nie.

“Hulle kan dus geen professionele werk doen of afteken nie. Volgens Solidariteit gaan hulle dus óf onwettig werk, óf baie beperk wees met wat hulle kan doen. Dit maak die invoer van die Kubane nog minder rasioneel,” sê Hermann.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Heinrich

Dankie Solidariteit, vat hulle vas.

Koos

Miskien kan die Kubane by Hartbeespoortdam kom help.Duidelik is daar niemand in die land wat iets weet vd toestande van die damme nie.Die minister het ook seker nog nie damme se toestand in lewende lywe gesien nie wat nog van riool wat in strate af loop.

Nie Verbaas

Laat sy vir haar kry. Dink mos hulle kan doen net wat hulle wil.

Jakes

Maar net nog n minister wat onbevoeg is vir die pos wat sy beklee.

Dries

Dankie dankie Solidariteit. Julle is SA se helde