Roodepoort-kaping: Kind ontslaan

Martinique en Abigail by die huis. Foto: Verskaf

Martinique en Abigail by die huis. Foto: Verskaf

Die negejarige meisie wat Vrydag in Roodepoort saam met haar ma, broer en kleinsussie gekaap en ontvoer is, is uit die hospitaal ontslaan.

Alan Bright, Abigail Bright se oom, het bevestig sy is Dinsdagmiddag ontslaan en sterk nou tuis aan. “Nou lê ses weke se rus in die bed voor,” het hy gesê. Abigail is nou tuis by haar pa, Eugene en babasussie, Martinique (1).

Maroela Media het vroeër berig Marilize Bright (34) het Vrydagmiddag kort voor 15:00 vir Abigail en haar jonger boetie, Damian (7), by Laerskool Horison in Roodepoort gaan oplaai in haar blou Hyundai i20. Sy het toe gery om vir Martinique by haar kleuterskool daar naby op te laai, toe hulle deur drie mans gekaap is. Die verdagte wat bestuur het, het sowat 5 km verder op ʼn skerp draai beheer oor die motor verloor en is oor ʼn randsteen voordat die motor teen ʼn bakkie, wat ʼn woonwa gesleep het, gebots het.

Almal, behalwe Martinique, het ernstige beserings in die botsing opgedoen. Volgens Alan, Eugene se broer, is Marilize en Damian se toestand steeds kritiek, maar stabiel. “Tydens Eugene se besoek aan Marilize Dinsdag het sy regop gesit, met hom gesels en iets geëet. Die dokters is tevrede met haar en Damian se vordering. Die dokters wil Damian later vandeesweek van die ventilator afhaal.”

Die drie vermeende kapers is ook ernstig in die botsing beseer. Maroela Media het vroeër berig die verdagtes was veronderstel om Maandag in die Roodepoort-landdroshof te verskyn, maar die saak is uitgestel, aangesien twee van die verdagtes steeds in die hospitaal is.

Lees alle vorige berigte oor die Bright-gesin op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

10 Kommentare

Kanna ·

Baie bly dat nog n kind ontslaan is. Bid nog vir die ma en boetie. Hou ons asb op hoogte.

Gesiggie ·

Ag ek is so bly.. nou moet Mamma en Boettie ook net gou beter word, sodat hul ook kan huistoe kom, Mag jul almal weer gou op die been wees… Sterkte

SNEL ·

Wonderlike nuus, so bly dit gaan so goed met almal van hulle.

Linda ·

wonderlike nuus!!! Heer hou U hand oor die seuntjie en moeder ook!

Vra maar net ·

Baie bly dit gaan al stuk-stuk beter. Hoe gaan dit met die mense wat in die bakkie was? Hulle is ook slagoffers van hierdie kaping.

Theresa B ·

Alle eer aan die Hemelse Vader. Kyk net daardie pragtige smile. Al jou maats kan mooi prentjies vir jou teken op jou gips. Jy is dapper pop. Nou wag ons net vir mamma en boeta. Sterkte julle. Daar is baie mense wat vir julle gesin bid. Sterk staan pappa.

Liz V ·

Beste nuus wat ek nog die heel dag gehoor het! Abby, jy is so dapper my engel, ek is so dankbaar en baie bly jy is nou by die huis!! Mamma en boetie sal ook binnekort by die huis wees!! Net soos tannie Teresa B gesê het, al jou maatjies gaan jou gips kan teken met boodskappies en prentjies en dit is die lekker deel van gibs. Ek het n paar keer gibs gehad aan my arms en my een been en was baie mal oor die boodskappies en prentjies.
Marilize en klein Damian, ons bid steeds vir julle en ons dink aan julle !! Eugene, jy is ook in ons gedagtes en gebede!

Ester ·

Ons dien n Here van wonders. Dankie Here dat waar U kinders saam staan antwoord U. Baie bly pragtige twee dogters dat jul by pappa is nou nog net mamma en boetie. Pappa staan sterk hou vas aan die Here Hy sal jou deurdra en krag gee.

Hannelie ·

Here U is so goed! Nou moet Marilize en klein Damian net gesond word. Jul is in ons gebede.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.