Rusland: Straf die regering, nie die land

Flip Buys, voorsitter van die Solidariteit Beweging. (Foto: Reint Dykema)

“Straf die Suid-Afrikaanse regering – nié die land en sy mense nie.”

Dít was die versoek van Flip Buys, voorsitter van die Solidariteit Beweging, Vrydag aan die Amerikaanse regering net nadat dié land se ambassadeur, Reuben Brigety, Suid-Afrika daarvan beskuldig het dat hy wapens aan Rusland verskaf het om in die oorlog teen Oekraïne te gebruik.

Buys sê die jongste ramp wat die regering oor Suid-Afrika gebring het deur glo wapens aan Rusland te lewer, gaan die land en sy mense duur te staan kom.

“Die VSA het reeds streng sanksies teen talle lande wat teen hom kant gekies het in die oorlog in Oekraïne.

“Die Amerikaanse ambassadeur het waarskynlik opdrag van pres. Joe Biden gekry om in die openbaar standpunt in te neem. Dit is hoogs waarskynlik dat die onlangse Suid-Afrikaanse afvaardiging na die VSA onder leiding van mnr. Sidney Mufamadi misluk het om gemoedere in Washington te kalmeer,” het Buys gesê.

Hy meen die regering se optrede is onverskoonbaar, veral omdat dit op ’n tyd kom wat die land reeds diep in die moeilikheid is.

“Hierdie jongste fout verseker bykans die kans op ’n resessie, en die val in die rand verhoog alle landsburgers se reeds hoë lewenskoste.

“Daarom is daar net een boodskap wat die Solidariteit Beweging aan die Amerikaners kan rig, en dit is dat hulle nie die land moet straf vir wat die regering aanvang nie. Hulle moet eerder die verantwoordelike regeringsleiers self teiken vir hul beoogde strafmaatreëls.”

Buys beskryf die ANC se optrede as ’n diplomatieke ramp en sê Suid-Afrika kan nie bekostig om in konflikte betrokke te raak waarby die land geen belang het en wat duisende kilometers weg is nie.

“Die regering behoort in landsbelang op te tree, en nie vas te steek in die vergete Koue Oorlog-era nie.

“Die regering het nou die kanse vir ’n 2023-resessie vergroot en die ANC se optrede verswak die rand so dat almal se lewenskoste verhoog. Die grootskaalse verkoop van Suid-Afrikaans gebaseerde aandele benadeel alle pensioenfondslede en die ANC moet daarvoor verantwoording doen.

“Die regering se optrede kan ook duisende mense se werk kos omdat dit neerkom op ’n verbreking van die gunstige (Wet op Groei en Geleenthede in Afrika, bekend as Agoa) handelsooreenkoms met die VSA.”

Buys sê voorts dit is duidelik dat die regering lynreg teen die nasionale belang optree. Betrokke regeringsleiers het volgens regslui ook wetgewing oortree deur wapens te lewer aan ’n land wat in ’n oorlog betrokke is.

“Dit is algemene kennis dat die Suid-Afrikaanse Nasionale Weermag (SANW) in ’n hopelose toestand is en nie in staat is om sy basiese pligte uit te voer nie. Dit blyk uit die powere stand van die lugmag, leër én vloot.

“Die regering het terselfdertyd die land se verdedigingsbedryf tot op die grond afgebreek deur die skandelike vernietiging van Denel. Die land wag ook nog in spanning vir vervolgings in die wapenskandaal wat dekades gelede al plaasgevind het. Daarby kom die vraag of daar enige korrupsie by die wapenverskaffing betrokke was.”

Volgens Buys het die regering nou al genoeg skade aangerig wat aan die verval van die land op elke gebied denkbaar sigbaar is.

“Die jongste krisis kan daartoe lei dat die land weer die muishond van die wêreld word, en ’n teiken van diplomatieke, ekonomiese en politieke strafmaatreëls.

“Daarom behoort hierdie korrupte en onbevoegde ANC-regering te bedank. Die land kan hulle net nie meer bekostig nie.”