SA Toerisme ‘melk stelsel’

Patricia de Lille. Argieffoto: Werner Beukes/SAPA

Patricia de Lille, minister van toerisme, het in antwoord op parlementêre vrae deur die DA erken dat die Suid-Afrikaanse Toerismeraad (SAT) sedert 2020 ʼn astronomiese R2 509 653,64 aan vergoeding, reis en verblyf bestee het.

“Dit is duidelik dat die direksie besig is om die stelsel te melk. Hierdie bedrag is nie ʼn weerspieëling van die groei in toerismesyfers oor dieselfde tydperk nie,” sê Manny de Freitas, die DA se woordvoerder oor toerisme.

Alhoewel net 10 van die raad se 57 vergaderings teenwoordigheid in persoon vereis het, is R769 548,47 nietemin aan reis- en verblyfskoste vir raadslede bestee.

“Dit is ongeveer R77 000 per vergadering vir reis en verblyf,” sê De Freitas.

Raadslede se vergoeding oor dieselfde tydperk het belastingbetalers meer as R1,6 miljoen gekos.

“Meer as R2,5 miljoen moet geregverdig word, die toerismeraad moet aandui hoe hierdie duur vergaderings die toerismesektor en toerisme regstreeks bevoordeel.”

Amptelike toerismestatistieke wat verlede maand vrygestel is, bevestig dat die toerisme-indiensnemingsaandeel van 4,8% in 2019 tot 3,1% in 2020 afgeneem het.

Die direkte bydrae van toerisme tot die bruto binnelandse produk (BBP) het van sowat R208 316 miljoen (3,7%) in 2019 tot R123 616 miljoen (2,2%) in 2020 afgeneem, ʼn afname van 40,7%.

Hoewel statistieke sedert die Covid-19-pandemie verbeter het, is toerismesyfers nog glad nie waar dit behoort te wees nie.

“Dit maak die roekelose besteding deur lede van die SAT-raad selfs meer ontstellend, ” sê De Freitas.

“Bykomende vrae sal aan die minister gestel word, veral oor die peperduur vergaderings wat die SAT-raad hou.”