SAUK gekap oor ‘plan vir Afrikaans’  

SAUK-gebou in Kaapstad. (Foto: Maroela Media)

Die lewering van die Afrikaanse inhoud bly ʼn sleutelaspek vir die SAUK en sal nie in die gedrang gebring word nie.

Só het die SAUK gereageer op ʼn vraag of die plan om Afrikaanse inhoud van SABC2 na SABC3 te skuif ten doel het om van Afrikaans ontslae te raak.

Oorblywende Afrikaanse inhoud sal glo binnekort van kanale verskuif word. Volgens Mmoni Seapolelo, woordvoerder van die SAUK, is die videovermaak-afdeling voortdurend betrokke by verskeie strategieë om die inhoudsaanbod te verbeter, wat kan lei tot programverskuiwings en wat verskuiwings na ander kanale behels.

“Die verskuiwings word ingelig deur gedetailleerde insigte, insluitend oorweging van die SAUK se finansiële volhoubaarheid.”

SABC3 se uitsaaisein is glo veel swakker as SABC2 en die kanaal het baie minder kykers.

Jan Bosman, hoofsekretaris van die Afrikanerbond, sê die strategie om Afrikaanse inhoud na SABC3 te skuif word waarskynlik polities gedryf. “Die reikwydte en opvangs van SABC3 is veel kleiner en Afrikaanssprekers in die Wes-Kaap en Noord-Kaap sal gevolglik aan die kortste ent trek. Die besluit is gevolglik ʼn ontkenning van die demografiese realiteite.”

Bosman sê die oortuiging dat daar politieke motiewe agter die besluit is, is gegrond op die SABC se eie nienakoming van redaksionele beleid en verbintenis tot die bevordering en uitbreiding van die taalaanbod.

“Van ewewigheid en gelyke respek is hier nie sprake nie want Afrikaans word afgeskaal en beperk met die aanbod in die nuwe strategie. Die vraag ontstaan dus wie die invloed het om taalbeleid eensydig te wysig om besluite wat waarskynlik polities beïnvloed is, af te dwing op kanale en taalgebruik deur ʼn openbare uitsaaier.”

Bosman meen dit sou interessant wees om te verneem of die SABC se bestuurshoofde hulle onderwerp het aan hul eie redaksionele beleid, wat insluit ʼn taalbeleid, in die kortsigtige besluit om Afrikaans af te skaal na ʼn veel kleiner kanaal. “Indien wel sou die bestuurshoofde besef het dat Afrikaans nie net ʼn streekstaal is nie, maar in werklikheid ʼn groeiende en nasionale taal is.

“Die SABC pluk egter die vrugte van eie finansiële tekortkominge en wanbestuur en ʼn verminderde aanbod van Afrikaanse inhoud die laaste jare, wat sepies insluit. Dit is jammer dat die openbare uitsaaier die geleentheid mis en so skouspelagtig faal in sy openbare mandaat. Ander kommersiële kanale en maatskappye het die geleentheid en waarde van Afrikaans ingesien en benut dit ten volle. Dit is aanduidend van die waarde van Afrikaans en getuig opnuut daarvan dat Afrikaanssprekendes altyd vasberade is om ʼn pad te vind om hulle eie taal te handhaaf, deur gedrukte media, radio en ook met TV-dienste en kanale.”