Seun (8) ontbied hulp ná plaasaanval

Argieffoto

Argieffoto

ʼn Agtjarige seun het met behulp van ʼn handradio hulp ontbied nadat hy en sy ouers Sondag op hul plaas buite Clocolan in die Vrystaat deur minstens vier gewapende aanvallers oorval is.

Carl du Randt, sy vrou en hul seun, Carl jr., is omstreeks 18:00 die aand deur die aanvallers ingewag nadat hulle teruggekeer het uit Bloemfontein waar hulle die ander kinders teruggeneem het skool toe. “Ons het by die huis stilgehou en toe ek uit die motorhuis stap, het vier van die aanvallers met vuurwapens op my afgekom,” het Du Randt Dinsdag aan Maroela Media vertel.

“Hulle het my met polisieboeie geboei en my vrou en seun gedwing om uit die motor te klim. Hulle het ons gedwing om die huis oop te sluit en die kluis se sleutels aan hulle te oorhandig. Hulle het heeltyd gesê hulle soek geld.”

Volgens Du Randt het die aanvallers die gesin daarna in ʼn vertrek in die huis vasgebind voordat hulle kontant en ʼn vuurwapen uit die kluis geneem en met nog ʼn paar huishoudelike items in sy bakkie op die vlug geslaan het.

“My seun was gelukkig nie baie styf vasgebind nie. Hy kon homself loswikkel en het oor die radio om hulp geroep. Die bure het dadelik gereageer en op pad na die plaas het hulle die aanvallers voorgekeer,” het Du Randt gesê. “Die aanvallers het egter uit die bakkie gespring en te voet gevlug.” Die gesteelde vuurwapen is later in die bakkie teruggevind.

Binne enkele oomblikke was baie ander boere uit die gemeenskap en lede van die polisie ook op die toneel en het gehelp om na die aanvallers te soek. Die verdagtes het egter deur die Caledonrivier na Lesotho ontsnap.

Kapt. Phumelelo Dhlamini, woordvoerder van die polisie, het die voorval aan Maroela Media bevestig en gesê volgens die polisie se inligting was daar sewe aanvallers by die voorval betrokke. “Die gesin het gelukkig geen beserings opgedoen nie en ʼn saak van huisbraak word ondersoek.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Adoons

Huisbraak of gewapende roof?

Hannie

JA! ….. en so moet ons kinders elke dag in vrees lewe! Is dit nie ‘n kind se reg om ‘n normale vreeslose lewe te lei nie?????

Asjas

Ek hoop daar was krokkedille in daai rivier en ek hoop hulle was honger!!

Johannes

Dit is tyd dat ons ophou petisies teken en eerder ons geld en tyd spandeer om ons eie gewapende mag/vleuel op die been te bring. Iets soortgelyks aan die Kommando sisteem.

Johan

Wat van ‘n klag van terreur. Plaasaanvalle is mos nou prioriteitslys misdaad en kan seker geklassifiseer word as terreuraanvalle. Georgistreerde (7 aanvallers) gewapende terreuraanval