Spioenasiebande-saak: Partye eis Zuma se kop

Pres. Jacob Zuma. Foto: Kopano Tlape/GCIS

Verskeie politieke partye het Vrydag reageer nadat die appèlhof in Bloemfontein uitspraak gelewer het in die sogenaamde spioenasiebande-saak teen pres. Jacob Zuma.

Dit volg nadat regter Eric Leach die Nasionale Vervolgingsgesag (NVG) en Zuma se aansoeke om verlof tot appèl met koste van die hand gewys het. Zuma en die NVG het die appèlhof genader nadat die hooggeregshof in Pretoria verlede jaar beslis het dat die besluit, om Zuma nie te vervolg nie, irrasioneel was en dat die 783 strafregtelike aanklagte teen die president weer ingestel moet word. Zuma en die NVG is vir die koste van die appèl verantwoordelik.

Die DA het die uitspraak verwelkom en gesê die party gaan aan adv. Shaun Abrahams, die nasionale direkteur van openbare vervolging, skryf om aanklagte so gou moontlik teen Zuma in te dien sodat hy in die hof kan verskyn op aanklagte van korrupsie en bedrog.

“Ek gaan Shaun ‘die skaap’ versoek om hom daartoe te verbind om die 783 aanklagte teen Zuma weer in te stel en die mense van die land ʼn datum te gee wanneer die aanklagte hanteer gaan word,” het Mmusi Maimane, die DA se leier, tydens ʼn perskonferensie gesê.

Maimane het gesê Abrahams moet binne 10 dae ʼn antwoord gee. “Die aanklagte is reeds geformuleer en ons glo al die bewyse is gereed. Zuma moet so gou moontlik verhoor word.”

Die VF Plus het die uitspraak verwelkom en gesê dit moet as ʼn oorwinning vir geregtigheid beskou word.

Dr. Pieter Groenewald, leier van die VF Plus, het gesê die uitspraak is baie tegnies van aard, maar was te wagte in die lig van die feit dat die president se eie regspan voorheen toegegee het dat die aanvanklike beslissing van die NVG om hom nie te vervolg nie, “irrasioneel” was.

“Die vraag is nou of die president met die nuwe vervolging ʼn kans gegun gaan word om redes aan te voer en vertoë te rig aan die NVG oor waarom hy nie vervolg moet word nie,” het hy gesê.

“Die VF Plus sal wil sien dat die president en die NVG die beslissing van die appèlhof eerbiedig en uitvoer en nie belastinggeld verder vermors in ʼn poging om hulle tot die konstitusionele hof te wend nie,” sê dr. Groenewald.

Genl. Bantu Holomisa, leier van die UDM, het gesê Zuma moet as president bedank en teregstaan op die aanklagte, andersins moet die ANC hom herroep.

Cope het ook die uitspraak verwelkom. Pakes Dikgetsi, die party se nasionale voorsitter, het die NVG ook versoek om Zuma so gou moontlik te vervolg.

“Die party was altyd van mening dat daar ʼn prima facie-saak van korrupsie teen Zuma is waarvoor hy in die hof verantwoording moet doen,” het Dikgetsi gesê. “Noudat die appèlhof duidelikheid oor die saak gegee het, verwag ons dat verdere stappe so gou moontlik gedoen moet word. Die bal is nou in die hande van adv. Abrahams en die NVG. Die NVG moet ophou om as die beskermer of verdediger van ʼn strafbare verdagte op te tree. Hulle moet die waarde van die Grondwet en beginsels van die NVG handhaaf.”

Lees meer oor die spioenasiebande op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
Pietie

Zuma moet tronk toe. Maar hy weet om sy maats te kry om hom te beskerm.

Johann

Hoe vang jy n slang soos die wat teen n opdraande uit gly? Veral as hy die mag en pag van Shaun the sheep het wat hom hou waar hy is: ONAANTASBAAR! Wat my die siekste maak, is die vermetelde arrogansie wat hy mee operate…hehehhehhe. ANC LEGACY: só verwoes een magsbehepte bokwagter n land saam met sy mede vergrypers!

Plantasie Gorilla

Maar Oompie Jacob, as jy niks het om weg te steek nie gaan hof en bewys jou onskuld. Wat briek jy so, dan moet ek mos dink jy is skuldig.

Boerseun

30% van samelewing eis sy kop, kom ons kyk hoe werk julle demokrasie.

Buitestander

Die oompie sal allankal afgtereë het dan sal hy nog nie in die hof verskyn het nie.
Spaar julle asems.