Suid-Afrika is tans vyfde op die medaljelys by die Statebondspele in Birmingham.
Span Suid-Afrika het reeds ses goue medaljes, vyf silwer- en vyf bronsmedaljes ingepalm.
Lara van Niekerk, Tatjana Schoenmaker en Pieter Coetzé het Dinsdagaand nog drie medaljes vir Suid-Afrika in die swembad losgeswem. Van Niekerk het die 100 m-borsslagitem in ’n tyd van 1:05.47 gewen, terwyl Tatjana Schoenmaker (1:06.68) die silwermedalje ingeoes het. Coetzé het die bronsmedalje in die 200 m-rugslagitem gewen.
Suid-Afrika se rolbalvroue het vroeër Dinsdag ‘n silwermedalje gewen. Thabelo Muvhango, Bridget Calitz, Esme Kruger en Johanna Snyman het in die eindstryd met 10-17 teen Indië verloor.
Die Suid-Afrikaners het naelskraap nog ’n hele paar medaljes misgeloop. Die gemengde wisselslag aflosspan van Chad le Clos, Van Niekerk, Coetzé en Aimee Canny het vierde geëindig en net-net die bronsmedalje gemis. Michael Houlie het ook net-net die bronsmedalje gemis in die 50 m-borsslag.
In die vrouediskus het Yolandi Stander sesde geëindig met ’n beste gooi van 55,49 m. Michaela Pulford het ook sesde geëindig in die 800 m-vryslag terwyl Adrian Wildschutt vyfde geëindig het op die atletiekbaan in die 10 000 m vir mans.
Suid-Afrika se medaljewenners:
Naam | Item | Medalje |
Pieter Coetzé | 50 m-borsslag | Silwer |
Pieter Coetzé | 100 m-rugslag | Goud |
Pieter Coetzé | 200 m-rugslag | Brons |
Kaylene Corbett | 200 m-borsslag | Brons |
Erin Gallagher | 50 m-vlinderslag | Silwer |
Chad le Clos | 200 m-vlinderslag | Silwer |
Christian Sadie | 50 m-vryslag S7 | Brons |
Tatjana Schoenmaker | 200 m-borsslag | Goud |
Tatjana Schoenmaker | 100 m-borsslag | Silwer |
Lara van Niekerk | 50 m-borsslag | Goud |
Lara van Niekerk | 100 m-borsslag | Goud |
Caitlin Rooskrantz | Trapbrug | Brons |
Charne Griesel | Judo | Brons |
Michaela Witbooi | Judo | Goud |
Vrouerolbalspan | Rolbal | Silwer |
Blitsbokke | Sewesrugby | Goud |
Baie mooi, so trots !
Welldone