Strate gesluit, skole beveilig oor onwettige betoging

Wetstoepassers hou ’n wakende oog terwyl deelnemers aan ’n onwettige optog na Vredenburg se middedorp opruk. Foto: Verskaf

Die Saldanhabaai-munisipaliteit aan die Kaapse Weskus het inwoners en besoekers Dinsdagoggend gewaarsku om Vredenburg se hoofstraat tot verdere kennisgewing te vermy terwyl ʼn onwettige optog daarheen op pad is.

Sakeondernemings in die Weskusdorp se hoofstraat is gesluit en werknemers kruip in winkels en kantore weg terwyl betogers uit ʼn informele nedersetting aan die buitewyke van die dorp daarheen opruk.

Petra Mei, kommunikasiebeampte van die burgemeester, Marius Koen, sê die onwettige optog handel grootliks oor behuising, maar die betogers is ook ontevrede oor ʼn gebrek aan dienslewering in die algemeen en dring aan op werkgeleenthede.

“Ons het alles onder beheer,” het sy aan Maroela Media gesê. “Ons wetstoepassers is uit na die toneel en skole het reëlings getref om hul leerders te beveilig. Ons het ook massa-SMS’e uitgestuur na inwoners en hulle op Facebook gewaarsku om op hul hoede te wees.”

Sy sê Koen het sowat vier weke gelede ʼn vergadering met gemeenskapsleiers van die informele nedersetting gehou waartydens hy hulle verseker het die munisipaliteit doen alles in sy vermoë om goeie dienslewering aan alle inwoners te verseker. Mei sê dit lyk asof sommige inwoners intussen ongeduldig geraak en vanoggend se optog gereël het.

Die DA het Saldanhabaai in 2016 se munisipale verkiesing met ʼn volstrekte meerderheid van meer as 61% stemme gewen. Die ANC het minder as 30% stemme gekry, vergeleke met net oor die 30% in 2011 se verkiesing, toe die DA 57% stemme op hom verenig het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Jan

Gee vir hulle, wat hulle vra. dis mos hoe dit werk in ons land

Nel

Die oomblik wat besighede gesluit moet word, mense kruip weg en moet gewaarsku word om sekere gebiede te vermy, skole moet beveilug word , is dinge nie meer in beheer nie!!!!!

Ja nee

En die (twee) passiewe polisielede staan hande in die sakke en toekyk.
Classic.

Sarie

Madre, ek stem laat waai, wil nie hoor nie.

Weskus

Ek pas gehoor daar het n baba gesterf van traangas en inwoners woedend.