Talle onwettige grondgrypgevalle in Gauteng

Onwettige grondgrype in Olievenhoutbosch. Foto: @PairCmanenje/Twitter

Die Tshwane- en Johannesburg-metropolisie moes die afgelope naweek bontstaan toe chaos op verskeie plekke in Gauteng losgebars het nadat plakkers onwettig grond begin beset het.

Sr.supt. Isaac Mahamba, woordvoerder van die Tshwane-metropolisie (TMPD), het gesê onwettige grondgryping het in verskeie dele van Pretoria voorgekom.

In Eastlynne, oos van Pretoria, is rubberkoeëls Saterdag afgevuur om ʼn oproerige skare uiteen te jaag nadat plakkershutte afgebreek is. Volgens Mahamba is daar onwettig plakkershutte opgerig en die mense reeds opdrag gegee om die strukture af te breek.

“Hulle het egter nie daaraan gehoor gegee nie en ons het ʼn diensverskaffer aangestel om die plakkershutte af te breek. Die TMPD het sekuriteit verskaf terwyl daar sowat 188 plakkershutte afgebreek is.”

Volgens Mahamba het gemeenskapslede hierna die strate ingevaar, buitebande gebrand en paaie afgesper. “Volgens ons inligting is niemand beseer tydens die oproerigheid of in hegtenis geneem in verband met die voorval nie.”

Onwettige grondgrype in Olievenhoutbosch. Foto: @ThabisoNkwana4/Twitter

In die omgewing van Olievenhoutbosch naby Rooihuiskraal en Blue Hill naby Midrand was die situasie ook gespanne nadat plakkers erwe begin uitmerk en huise begin oprig het. Volgens Mahamba is daar erwe “uitgedeel” aan enkelinge. “Ons monitor die situasie hier. Ons waarsku voornemende plakkers dat ons binne die wet sal optree en dat plakkershutte verwyder sal word.”

Daar was volgens berigte ook grondgrypgevalle in Atteridgeville en Soshanguve-Suid. Mahamba het gesê hulle is bewus daarvan dat grondgryping oor groot dele van Pretoria plaasgevind het. “Die TMPD sal sterk optree teen onwettige grondgryping. Dit is teen die wet en ons sal ons gesag afdwing. Niemand sal onwettig grond in Pretoria beset nie. Grond wat privaat of deur die stad besit word, kan nie net sonder meer beset word nie.”

Onwettige grondgrype in Eastlynne. Foto: @Antoine15950715/Twitter

Mahamba het gesê die TMPD sal vandag op nog ʼn gebied toeslaan waar grond onwettig beset is. Hy wou egter om veiligheidsredes geen verdere besonderhede bekend maak nie. Hy het wel gesê dit is in die noorde van Pretoria.

Volgens Mahamba tree hulle met die onderskeie polisiestasies in verbinding om te bevestig of enige mense die naweek in hegtenis geneem is in verband met onwettige grondgryping. In Pretoria kan lede van die publiek wat onwettige plakkery opmerk die TMPD nader by 012 358 7095.

Sr.supt. Wayne Minnaar, woordvoerder van die Johannesburg-metropolisie (JMPD), het bevestig die situasie in die Blue Hill-omgewing word gemonitor. Daar word op ʼn hofbevel gewag sodat ʼn operasie begin kan word om onwettige strukture af te breek.

Volgens Minnaar is daar Sondag in Alexandra verskeie onwettige strukture afgebreek. Hy het gesê rubberkoeëls is ook afgevuur om die oproerige skare uiteen te jaag. In Johannesburg kan lede van die publiek wat grondgrypgevalle wil aanmeld, die JMPD nader by 011 375 5911.

Onwettige grondgrype in die Blue Hills-omgewing. Foto: @Sloja_SA/Twitter

Kapt. Mavela Masondo, provinsiale woordvoerder van die polisie, het gesê sover sy wete strek, is geen mense die naweek in hegtenis geneem in verband met onwettige grondgryping nie.

Die sakeregte-organisasie AfriSake het intussen bevestig hy win tans ʼn regsmening in verband met die onwettige grondgryping die naweek in. Dit volg nadat die organisasie vroeër saam met AfriForum ʼn interdik teen sowel die EFF as Black First Land First (BLF) bekom het, asook teen die onderskeidelike woordvoerders van hierdie organisasies. Die interdik verbied dié partye om uitlatings te maak wat mense opsweep om grond onwettig te gryp.

Piet le Roux, uitvoerende hoof van AfriSake, het gesê hulle stel tans die feite vas rakende die naweek se gebeure. “Daar is bewerings dat EFF-lede hierby betrokke was, so ons moet nou seker maak dit was wel die geval. Ons het interdikte teen sekere gedrag. Sodra ons ʼn regsmening het, kan ons kyk wat ons kan doen.”

Le Roux het AfriSake-lede aangemoedig om die organisasie onverwyld te nader indien hulle die slagoffer van grondgryping is sodat die organisasie onmiddellik kan optree. “Mens kan dadelik optree en so gou moontlik grondeienaars se regte afdwing.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

41 Kommentare

jongste oudste gewildste
Patriot

En toe kry die stedelinge `n skok. Gedink dit gaan net met die plase gebeur…

Gertryda

Nou toe nou
Hoe kan hul alreeds opgerigte strukture afbreek????
Op plase moet jy n hof bevel kry as n paar pale met n dak op opgerig is

Penellope Jones

So reg rondom die stad, soort van . . . . . . .
Moet NOOIT hierdie mense onderskat nie, nooit.
Hulle sal mens verras wanneer mens dit die allerminste verwag. . . . . . . .

dolphin

mooi dis nie plek van grond gekoop nie moet betaal word sodat president moet praat van die grondwet maar waarom mense glo die malema moet die grond vat nee !

honourable member

Sal graag die bouplanne wil sien vir die stellasies wat opgerig is. By ons huise soek die munisipaliteit bouplanne of kan die mense nou bou en breek soos hulle wil.