(Foto: Janan Lagerwall/Unsplash)
Barbara Creecy, minister van bosbou, visserye en omgewingsake, het onlangs in antwoord op ʼn parlementêre vraag erken dat hoewel die Tafelberg Nasionale Park (TMNP) miljoene rand genereer, daar geen werklike prioriteit is om die park – of die talle toeriste wat die skilderagtige staproetes besoek – te beskerm nie.
JP Smith, Kaapstadse burgemeesterskomiteelid vir veiligheid, sê die TMNP sluit meer as 800 km se staproetes in en het groot toeriste-aantreklikhede; dit sluit die kabelspoor, Duiwelspiek, Leeukop en Seinheuwel in.
“Die departement van bosbou, visserye en omgewingsake (DFFE) het beheer oor alle sake wat met die nasionale park verband hou en het deur die Suid-Afrikaanse Nasionale Parke (SANParke,) die mandaat om die park en sy besoekers veilig te hou.
“Na ʼn oplewing van misdaad binne die TMNP-gebied, verhoog die Stad Kaapstad sy steun aan SANParke en die polisie in hul pogings om misdaad te bekamp.
“Die onlangse parlementêre antwoord van die nasionale regering toon egter ʼn gebrek aan toewyding om die nasionale park doeltreffend te bestuur, soortgelyk aan die probleme wat by ander toeriste-aantreklikhede soos die Kasteel die Goeie Hoop gesien word,” sê Smith.
Hy sê luidens die skriftelike antwoord het Creecy toegegee dat TMNP slegs 70 veldwagters in diens het, wat op ʼn beperkte skedule werk.
“Van die 168 uur in ʼn week wat deur operasionele ontplooiing gedek moet word, is die veldwagters elk vir 45 uur daarvan ontplooi. Daar word ook verstaan dat die meerderheid van hierdie ontplooiing gefokus is op die suide van die park – by die mariene reservaat – waar onwettige stropery hoogty vier.
“As ʼn stad het ons baie gedoen om ons plaaslike ekonomie ná die pandemie te stimuleer en ʼn groot fokus hiervan was vir ons die toerismesektor. TMNP het ʼn jaarlikse inkomste van sowat R300 miljoen, met ʼn uitgawe van R97 miljoen.
“Dit laat die vraag ontstaan: As SANParke nie genoeg hulpbronne het nie en te min veldwagters het, waar gaan al die geld heen wat ingevorder word? Dit gaan vermoedelik na die subsidiëring van ander parke in Suid-Afrika,” sê Smith.
Hy meen as selfs net die helfte van die R200 miljoen surplus wat elke jaar gegenereer word deur die regering toegewys word om bykomende hulpbronne te finansier, die Stad Kaapstad ʼn bykomende 400 wetstoepassingsbeamptes by die Tafelberg Nasionale Park kan finansier.
“Dit is vyf keer meer as die huidige veldwagter-ontplooiing. Dit sal die veiligheid van besoekers aan die park aansienlik verbeter.”
Smith sê as ʼn gedeelte van die begroting gebruik word om bykomende tegnologie, onder meer kameras, hommeltuie en lug-ondersteuning, te finansier, kan hulle soveel meer bereik en verseker dat plaaslike en internasionale besoekers veilig gehou word en sodoende meer toeriste lok en meer werksgeleenthede skep.
“Nie net kan dit gedoen word nie – dit móét gedoen word.
“Ons sal voortgaan om die plaaslike polisie en SANParke-veldwagters in die park te ondersteun so ver ons moontlik kan.
“Ons Tafelberg Nasionale Park is meer as net ʼn sakebate. Dit is deel van ons erfenis en ons moet verseker dat ons dit met meer as net leë beloftes beskerm,” sê Smith.
Die geld gaan nie na die ander parke toe nie, dit gaan sakke toe.
Veiligheid is n vreemde woord in die regerende party en die land se misdaad syfers spreek boekdele daaroor, op die ander hand het die DA die vuil manier om alle samerwerking te ondermyn deer enige gesamentlike sukses as hulle eie gewin toe te staan so ja dubbel snyende swaard.
Die buitelanders hou die trog lekker vol, en die kaders is HONGER!!!
Ons leiers sal geen vinger verroer om die Berg en natuur reservaat te beveilig nie, talle moorde, rooftogte en aanrandings het al gebeur, helfte is nie eens aangemeld nie. Nee wat, ek bly maar weg van die pragtige natuur ikoon, selfde met Leeukop, ek ry verby en neem foto’s van Blouberg af, tog maar mooier. Ek sal natuurlik almal afraai om die natuurskoon te gaan besigtig van nader af, “after all” is die crime nie die sous werd nie.
As die Wes-Kaap afstig gaan die kriminele seker almal verdwyn.
Kriminele het die neiging om beter bestuurde, westerse areas te vermy ja. So onafhanklikheid sal baie beslis misdaad verlaag.
Definitief gaan hulle nie verdwyn nie, maar hulle moet weet dat hulle gevang en behoorlik gestraf sal word.
Die DA het ander prioriteite, hulle wil nou die hele land regeer al is daar geen kams nie en al bly hulle steun verloor, veral noudat hulle die kapenaars in die rug gesteek het teen onafhanklikhedsreferendum wat hulle vroeer belowe het.
?????? Ekskuus!! Wonder hoekom die Weskaap werk.
Die weskaap werk omdat dit die enigste provinsie is wat westers georienteerde kiesers en mees ontwikkelde bevolking het, die DA staan op sterk basis daar. Maar die DA se ondersteunerpersentasie val by die maand soos semingrante inbeweeg en plakkerskampe groter as die dorpe groei. Gou sal die ANC of EFF daar ook oorneem, maar die DA het onafhanklikheidsreferendum belowe, maar dit toe nie nagekom nie. Nooit weer salons die DA vertrou nie.