Video: Gestremdes aan eie lot oorgelaat weens staking

Die San Michele-tehuis in Brakpan sien na ongeveer 200 psigiatriese en gestremde pasiënte om. Foto: Verskaf

Die bestuur van San Michele-tehuis vir psigiatriese en gestremde pasiënte in Brakpan aan die Oos-Rand moet bontstaan om na nagenoeg 200 pasiënte om te sien sedert die meeste lede van die tehuis se personeel begin staak het.

Marius Bosman, administrateur van San Michele, het Saterdag verduidelik nagenoeg 90 personeellede, wat onder andere versorgers, kosmakers en skoonmakers insluit, staak sedert Vrydagoggend oor lone en bonusse.

“Waar ons gewoonlik ’n personeelkorps van sowat 85 mense deur die dag het en aandskofpersoneel van 15, het ons tans slegs een matrone en vyf vrywilligers om na ons 203 pasiënte om te sien,” het Bosman gesê.

“Ons ervaar tans ’n krisis en moet met die hulp van die min vrywilligers sorg dat die pasiënte kos kry, gevoer, asook gebad en versorg word.”

Hannes Noëth, uitvoerende direkteur van Solidariteit Helpende Hand, het afgevaardigdes van dié welsynsorganisasie na die tehuis gestuur om dringend in te gryp.

Nagenoeg 40 werkers van die vakbond Nupsaw (National Union of Public Service and Allied Workers) het Saterdag buite die tehuis betoog. Hulle het Vrydag en Saterdag glo werkers wat nie wou staak nie geïntimideer.

Volgens Phillip Bruwer, woordvoerder van Helpende Hand, het betogers Saterdag ook vrywilligers wat opgedaag het om te help, probeer verhoed om toegang tot die perseel te kry.

Volgens Bosman is dit ’n beskermde staking nadat onderhandelinge by die Kommissie vir Versoening, Bemiddeling en Arbitrasie (KVBA) ’n doodloopstraat bereik het.

Werknemers van die San Michele-tehuis staak oor lone en bonusse en het buite die tehuis saamgedrom. Foto: Verskaf

“Die KVBA het vandeesweek die staking goedgekeur ondanks die feit dat ons ’n instelling vir noodsaaklike dienste is. Dit het grootliks tot die krisis gelei en ons beraadslaag met ons regsverteenwoordigers om ’n dringende interdik teen die stakers te verkry,” het hy gesê.

Bruwer sê Helpende Hand het intussen geld beskikbaar gestel om te sorg dat verpleegpersoneel tydelik aangestel word om te sorg dat die pasiënte hul nodige medikasie kan ontvang.

AfriForum en die plaaslike gemeenskapspolisiëringsforum het ook veiligheidspersoneel gestuur om te sorg dat vrywilligers toegang tot die perseel kon kry.

Vrywilligers spring aan die werk om kos voor te berei vir die inwoners van die San Michele-tehuis in Brakpan. Foto: Verskaf

Noëth het gesê die situasie is soortgelyk aan dié van Huis Davidtsz in Pretoria se middestad vroeër vanjaar waar talle bejaardes in twee voorvalle deur werkers weens loondispute aan hul eie lot oorgelaat is.

“Dit is regtig jammer dat werkers in húl onderskeie posisies die mense wat hulle moet versorg sommer net so in ’n toestand agterlaat. Hoe kan ʼn loongeskil bo die versorging van kwesbare mense voorrang geniet?” het Noëth gesê.

Bosman het gesê die grootste krisis tans is om genoeg arbeid te kry om die pasiënte te versorg en kos te gee.

Dr. Kobie Marais, waarnemende direkteur van die Gautengse departement van geestesgesondheid, sê die departement is bewus van die voorval en monitor die situasie.

“San Michele is een van die beste niewinsgewende organisasies vir ons psigiatriese pasiënte. Minstens 80 van die mense daar is afhanklik van permanente sorg en kan nie na hulself omsien nie. Vrywilligers van Helpende Hand en familielede help tans daar uit en die situasie sal na verwagting ten minste nog die naweek voortduur,” het Marais gesê.

Die stakers het geweier om met die media te praat en oproerig geraak toe hulle om kommentaar genader is.

Lede van die publiek wat hulp wil aanbied, kan hul naam en selfoonnommer na [email protected] stuur met ʼn aanduiding van hul beskikbaarheid tot Maandagaand.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Natw

Waarom, hul het die tipe werk gekies om na gestremdes te kyk en wat sê dit hul gee nie om vir hul nie ,gaan net vir hul om geld hul het geen waardes nie,dis baie hartseer

Sarel

Dit sal bly gebeur want daar word nie wetlik of dissipliner teen die mense opgetree nie. Hulle eerder bedank en beloon. Het SA geen Mediese Raad meer nie.

Wiehan

Wys jou net weer hoe siek is ons land

Gustav

Volkseie arbeid. So maklik soos dit.

Marie

Asb moet geen een van daai stakers weer terug in diens neem. Dalk daaraan dink om by die wit plakkers kampe van ons mense te kry om te help. Glo daar sal baie wees wat bitter graag sal help vir Klein vergoeding. Net voorstel