Vier verdagtes is doodgeskiet en daar is op vuurwapens beslag gelê nadat die polisie ’n transitorooftog in Soweto gefnuik het.
’n Intelligensie-gedrewe multidissiplinêre span bestaande uit lede van misdaadintelligensie en die nasionale ingrypingseenheid het omstreeks 14:30 Donderdagmiddag op inligting oor ’n beplande aanval op ’n geldwa gereageer.
Volgens kol. Athlenda Mathe, polisiewoordvoerder, het beamptes twee verdagte motors opgemerk wat agter die geldwa by ’n vulstasie in Bram Fischerville ingery het.
“Toe die verdagtes in die twee motors die polisiebeamptes opgemerk het, het hulle op die vlug probeer slaan en ’n hoëspoed-jaagtog het gevolg. Die beamptes het die verdagtes tot by ’n onbekende adres in die omgewing gevolg waar ’n skietery uitgebreek het.”
Altesaam vier verdagtes is doodgeskiet terwyl die ander daarin kon slaag om te vlug. Daar is op twee gewere en ’n pistool beslag gelê. Volgens Mathe sal ondersoek ingestel word oor of die verdagtes moontlik verbind kan word aan ’n vlaag gewelddadige misdade, insluitend verskeie transitorooftogte, die afgelope tyd in Gauteng.
Genl. Khehla Sitole, nasionale polisiekommissaris, het die span se waaksaamheid geloof en gesê ’n 72-uur-aksieplan is in werking gestel om die oorblywende verdagtes vas te trek.
