Vrou terug in hof oor k-woord

‘n Skermskoot uit die video wat deur eNCA op YouTube gelaai is.

Die saak teen die voormalige eiendomsagent wat verlede jaar op videokamera vasgevang is toe sy ʼn Johannesburgse polisiekonstabel die k-woord toegesnou het, is Dinsdag in die Randburg-landdroshof uitgestel.

Vicki Momberg (48) is in Februarie 2016 op beeldmateriaal vasgevang waar sy beweerde rassistiese uitlatings teenoor die polisiebeampte maak nadat ʼn grypdief haar motorvenster stukkend geslaan het.

Momberg staan tereg op vier strafregtelike aanklagte van crimen injuria vir haar beweerde uitlatings.

Joe Davidovitz, Momberg se regsverteenwoordiger, het aan die hof gesê hy is nie van voorneme om ʼn getuie voor die hof te roep nie, maar hy wil graag die verdediging se saak heropen ten opsigte van die verklarings wat deur Momberg gegee is.

Tydens Momberg se vorige hofverskyning het die staat gesê sy gebruik die k-woord 48 keer op die video. Momberg het gesê sy voel die saak word oordryf en ten tyde van die voorval wou sy nie ʼn swart mens naby haar gehad het nie.

Staatsaanklaer Yusuf Baba het die versoek van die verdediging om hul saak te heropen teengestaan en gesê dit sal die saak net laat sloer aangesien Momberg se verklarings reeds op rekord is. Landdros Pravina Raghoonandan het saamgestem dat Momberg se verklaring onder eed gelewer is en gesê dit is nie nodig dat die verdediging se saak heropen word nie.

Baba het versoek dat die saak uitgestel word om die regspanne die geleentheid te gun om hul slotargumente voor te berei.

Die Gelykheidshof het in Junie beslis Momberg moet konst. Clement Mkhondo R100 000-skadevergoeding betaal. Momberg is ook beveel om ʼn geskrewe onvoorwaardelike verskoning aan hom te rig, asook om gemeenskapsdiens te verrig as deel van ʼn program wat deur die Suid-Afrikaanse Menseregtekommissie (MRK) en geaffilieerde organisasies soos die Ahmed Kathrada-stigting aangebied word. As deel van die program sal Momberg die Apartheidsmuseum besoek en die MRK se gemeenskapsuitreikprogramme en sensitisering-werkswinkels bywoon.

Die strafregtelike saak is tot 13 September uitgestel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Leahim

Dit is asof MM hulle bes doen om rassespanning aan te blaas of is dit net ek wat so dink?

willie

Maar jy kan maar oor die micro foon sê kill the farmer en niks gebeur nie! R100000

Chevy

Waar was die gelykheidshof toe onaanvaarbare uitlatings gedoen is deur sekere regeringsleiders en politiekeleiders teenoor ons witmense?
Gelyke regte en gelyke pligte asook gelyke behandeling vir almal in Suid Afrika is baie ver te soek.

Mel

Stem saam jou leahim en willie, wel na vanaand se beslissing gaan ons blankes nog meer aftjop as ooit tevore

Susann de Beer

En wat van Malema se uitlatings dat all blankes moet uitgeroei word en hy bly in parlement. Klug