Watertoevoer is Vrydagoggend na verskeie Gautengse hospitale herstel.
Verskeie hospitale in Gauteng, onder meer die Helen Joseph-hospitaal, Rahima Moosa Moeder-en-Kind-hospitaal, die Zola-gemeenskapsgesondheidsentrum en die Dr. Yusuf Dadoo-hospitaal, was sedert Maandag sonder water, grotendeels weens ʼn tekort aan krag om water na die onderskeie reservoirs te pomp.
Die Gautengse departement van gesondheid het bevestig die probleem is nou opgelos en watertoevoer gestabiliseer na die meeste instellings, behalwe die Dr. Yusuf Dadoo-hospitaal in die Wes-Rand. Watertenkwaens sal steeds daar gebruik word. Hoewel die krag herstel is, sal dit dae neem vir reservoirs om te hervul en te stabiliseer.
“Die departement van gesondheid gaan voort om saam met die betrokke owerhede te werk om betroubare en volhoubare watervoorsiening vir die gesondheidsfasiliteite te verseker. Dit sal ons in staat stel om ononderbroke gesondheidsorgdienste aan die gemeenskap te verskaf,” lui die verklaring.
Maroela Media het vroeër berig die probleem is glo te wyte aan skade wat aan City Power se kragstelsels aangerig is. Dit het veroorsaak dat Rand Water se Eikenhof-pompstasie nie werk nie en het weer beteken dat water nie na reservoirs in Soweto en Johannesburg gepomp kon word nie.
Ha ha ha reg, tot môre toe dan breek iets weer……