Weermag slaan vure dood oor Ramaphosa se duur DRK-vlug

Pres. Cyril Ramaphosa kort voor sy vertrek na Kinshasa in die DRK. Die vlug het die lugmag R1,6 miljoen gekos. (Skermgreep: The Presidency/Twitter)

Die weermag slaan vure dood ná berigte die afgelope naweek dat hy ten duurste betaal het vir ʼn passasierstraler van die Suid-Afrikaanse Lugdiens (SAL) om pres. Cyril Ramaphosa en sy gevolg na die Suider-Afrikaanse Ontwikkelingsgemeenskap (SAOG) se beraad in Kinshasa te vlieg.

Dit sou sowat R800 000 vir agt vliegure gekos het om die afvaardiging met Inkwazi, die presidensiële Boeing-sakestraler, na die Demokratiese Republiek van die Kongo (DRK) te vlieg, het Sunday Times berig. Pleks daarvan het die weermag luidens die berig sowat R2,6 miljoen opgedok.

Geen vliegtuie van die lugmag se BBP-vloot is in hierdie stadium diensbaar nie, wat beteken die lugmag, wat verantwoordelik is vir die president se amptelike vlugte, moes ʼn private straler huur om die president en sy gevolg te vervoer.

Die weermag het nou teruggekap en sê die werklike koste verbonde aan die huurvlug was net minder as R1,6 miljoen.

Volgens die weermag kan Inkwazi en ander amptelike vliegtuie inderdaad nie tans gebruik word nie en daar is net beperkte kommersiële vlugte na Kinshasa. Dit sou die president se onmiddellike terugkeer ná die beraad vertraag het, sê Siphiwe Dlamini, woordvoerder van die weermag.

“Onder hierdie omstandighede het die lugmag kwotasies van moontlike diensverskaffers bekom om die president en lede van sy afvaardiging na Kinshasa in die DRK te vlieg. Die nasionale lugdiens, SAL, was een van verskeie bieërs by wie die lugmag kwotasies gekry het.

“SAL het die laagste gekwoteer op minder as R1,6 miljoen – ʼn miljoen rand minder as die R2,6 miljoen-‘beraming’ wat Sunday Times as feit probeer voorhou het,” sê Dlamini.

“Twee kwotasies vir aansienlik kleiner vliegtuie was na aan R1,9 miljoen elk.”

Dlamini sê dit is betreurenswaardig dat daar op gerugte van kwansuise bronne in die lugvaartbedryf staatgemaak is. Die departement van verdediging meen die koerant het verwysing na hierdie “bronne” gebruik as ʼn manier om die “onetiese” gebruik van inligting wat verskaf is deur ongemagtigde verdedigingspersoneel te verdoesel.

Volgens die departement was daar 14 passasiers aan boord van die vlug na Kinshasa en 55 mense het terug na Suid-Afrika gevlieg. Die getal sluit nie bemanningslede van die lugmag in nie.

Benewens die stelling dat die presidensiële straler en ander BBP-vliegtuie nie tans gebruik kan word nie, het die weermag geensins uitgebrei oor die voortgesette gebrek aan diensbare vliegtuie nie.

Maroela Media het vroeër berig die weermag steier weens gebrekkige instandhouding – weens ʼn tekort aan geld – van die lugmag se vloot. Die lugmag se begroting is lankal reeds ʼn toenemende bron van kommer, veral omdat die vliegtuie verouder is en midtermyn-opgraderingswerk benodig.