Twee mense is dood nadat ʼn vragmotor en ʼn motor Woensdagaand op die N2-deurpad naby die Tugelarivierbrug gebots het.
“Die voorval het omstreeks 21:00 plaasgevind. Dit is nog nie seker hoe die ongeluk gebeur het nie, maar die polisie ondersoek dit,” het Chris Botha, ʼn woordvoerder van Netcare911, gesê. “Die vragmotor het teen die kant van die motor, ʼn Volkswagen Polo, vasgery. Die Polo het in twee geskeur en die insittendes is uit die voertuig geslinger. Albei is op slag dood,” het Botha gesê. Die vragmotorbestuurder is vir skok behandel, maar is ongedeerd.
