’n Vulkaan het Vrydagaand naby Reykjavik, Ysland se hoofstad, uitgebars nadat dit vir meer as 900 jaar sluimerend was.
Die uitbarsting het omstreeks 20:45 sowat 40 km van Reykjavik plaasgevind nadat honderde klein aardbewings die gebied geskud het.
Die vulkaniese uitbarsting was egter klein en het geen gevaar vir mense ingehou nie.
Rooi lawa borrel sedertdien uit ’n spleet in ʼn vallei in Geldingadalur naby die berg Fagradalsfjall op die Reykjanes-skiereiland in die suidweste van Ysland.
Hoewel Ysland se Keflavik- internasionale lughawe en die klein vissershawe van Grindavik net ʼn paar kilometer van die vulkaniese uitbarsting geleë is, is die gebied onbewoon en dit lyk asof die uitbarsting geen gevaar inhou nie.
“Die uitbarsting word as klein beskou,” het die Yslandse meteorologiese sentrum, wat seismiese aktiwiteite monitor, Saterdag in ʼn verklaring gesê.
Volgens dié sentrum is die “uitbarstingskeur” ongeveer 500 meter tot 1 km lank.
“Daar is min uitbarstingsaktiwiteite in die gebied.”
Die uitbarsting het in die Krysuvik- vulkaniese stelsel plaasgevind. Dié stelsel was vir die afgelope 900 jaar sluimerend met die laaste uitbarsting op die Reykjanes-skiereiland wat byna 800 jaar gelede plaasgevind het. Dié uitbarsting het ongeveer 30 jaar, van 1210 tot 1240, geduur.
Die streek word egter die afgelope paar weke gemonitor nadat ʼn aardbewing van 5,7 op 24 Februarie naby berg Keilir aan die buitewyke van Reykjavik geregistreer is.
ʼn Ongewone aantal kleiner skuddings, meer as 50 000, is sedertdien geregistreer, die grootste getal kleiner skuddings sedert digitale opnames in 1991 begin het.
Ysland het 32 vulkaniese stelsels wat tans as aktief beskou word – die meeste vulkaniese stelsels in Europa. Die land beleef gemiddeld elke vyf jaar ʼn vulkaniese uitbarsting.
A new video of the eruption at Geldingardalur valley in Reykjanes peninsula. Taken from the Coast Guard helicopter. #Reykjanes #Eruption #Fagradalsfjall pic.twitter.com/B862heMzQL
— Icelandic Meteorological Office – IMO (@Vedurstofan) March 19, 2021
Tekens van die tye…