RSG se Amore groet ná 20 jaar

RSG se Amore Bekker. (Foto: Verskaf)

Amore Bekker, een van RSG se gewildste en bekroonde radio-omroepers, gaan na sowat twee dekades ʼn nuwe koers, weg van die radiomikrofoon af, inslaan.

Op Vrydag 28 April sal Amore vir oulaas van 09:00 tot 12:00 haar oggendprogram, Alhoebekker, aanbied. Op die vraag oor wat die toekoms vir haar inhou, antwoord sy dat daar afgesien van meer praatjies, stemwerk en toneel speel, ‘niks groots’ vir haar voorlê nie.

“Ek is dankbaar om elke dag drie keer te eet, en ek sal graag meer stemwerk vir advertensies wil doen, maar ek wil beslis geen berg gaan uitklim nie, en ek wil ook nie vir ʼn doktorsgraad gaan studeer nie. Eintlik wil ek so min as moontlik doen, want die lewe beweeg teen ʼn verbysterende spoed.”

Sy gaan dalk nie berg klim nie, maar van 14 tot 22 April gaan Amore haar stapstewels aantrek en die sowat 166 km tussen Williston na Verneukpan aandurf ten bate van droogtegeteisterde gemeenskappe in die Noord-Kaap. Dié staptog staan as die Tankwa-Camino bekend.

Amore se besluit om ʼn nuwe koers in te slaan het ook te doen met haar gevoel dat ʼn mens moet groet voordat mense jou wil groet, en dat jy nie langer op ʼn plek moet bly as wat jy welkom is nie.

“Jy moet ook só groet, dat jy altyd weer kan terugkom, as jy wou. Ek is dankbaar dat ek vir 20 jaar by RSG kon uitsaai. Ek het soveel geleer en beleef, dit was die perfekte leerskool vir my op alle vlakke.  Dankie, dankie!”

Volgens Louise Jooste, RSG se sakebestuurder, is Amore ʼn legende in die Afrikaanse uitsaaibedryf. “Sy verstaan die intimiteit en mag van die medium, en sy is ʼn oorrompelende storieverteller wat vir soveel onvergeetlike uitsaai-oomblikke en -projekte gesorg het. Sy laat ʼn reuse-leemte en diep voetspore, sy sal vir lank onthou word.”

In ʼn onderhoud met Maroela Media het Amore oor haar liefde vir taal, mense en kos gesels.

Vir Amore is dit belangriker dat sprekers van die taal mekaar verstaan en hulle harte uitpraat, eerder as om die heeltyd op korrekte taalgebruik te fokus. “Afrikaans is so lewendig, en ek voel ons moet die sirkel wyer trek sodat die lekkerte van die taal met ander mense gedeel kan word. ʼn Mens moet dit nie net vir jouself hou nie.”

Sy glo ook dat ʼn mens die genot van kos en samesyn met mense moet deel, en nie noodwendig in die vorm van ʼn formeel gedekte tafel, fênsie kos of duur porselein nie. Vir haar lê die grootste lekkerte in die eenvoud van ʼn karmenaadjie, of eenvoudig ʼn tjoppie.

“Jy weet, as dit die dag ‘bewolk’ gaan met my, dan maak ek disse wat my ouma gemaak het. My ma het dit nie eens gemaak nie. Daai disse van eenvoud: ʼn tjoppie in ʼn ysterpot met wonderpeper, sout en naeltjies. Dit is al. Jy kan mos nie so dis in Engels aanmekaarslaan nie? Dit vat my terug na my wortels toe. Taal, kos, liefde … al daai goeters is so ineen.”

Sy is tans die beskermvrou vir die Woordeboek van die Afrikaanse Taal (WAT) se Borg ʼn Woord-veldtog, en glo dat dit ʼn wonderlike geleentheid is om die taal en die WAT te ondersteun.

Amore het in 2003 die omroeperspos vir Brêkfis met Bekker, die ontbytprogram wat Saterdagoggende uitgesaai word, by RSG aanvaar. Later het Derrick Gardner die leisels by haar oorgeneem. Sy het toe begin om die middagprogram, Tjailatyd, aan te bied, en in 2019 het sy die aanbieder van Alhoebekker geword.

Tjailatyd het tot die publikasie van haar Tjailaresepte-boeke gelei. Later het Hartstories – Huis toe met ʼn ligter tred gevolg. Dié boek is geskoei op die “Saamrystories” wat Bekker in haar program op lug voorgelees het. Een van die gewilde insetsels op Tjailatyd was stories oor toevallighede, wat Bekker omskryf het as “Toe-Val-Lig”, en daaruit het óók ʼn gewilde boek gevolg.

Amore het  ʼn ATKV-Mediaveertjie vir die “Bottels vir Beaufort”-projek gewen. Met dié projek het sy mense landwyd aangemoedig om water na die droogtegeteisterde Beaufort-Wes te stuur. Sy het ook twee ATKV-Mediaveertjie vir Tjailatyd, en een vir haar onderhoud met wyle Aartsbiskop Desmond Tutu, ontvang.