Omdat daar voortdurend talle mense gekom en gegaan het sodat hulle selfs nie kans gekry het om te eet nie, het Jesus toe vir hulle gesê: “Kom julle nou self eenkant toe na ’n stil plek en skep ’n bietjie asem.” (Markus 6:31)
Nog voor dagbreek die volgende oggend het Jesus opgestaan en alleen op ’n stil plek gaan bid. (Markus 1:35)
Ek glo dat Jesus nooit haastig was toe Hy op aarde geleef het nie. Hy het altyd tyd gehad vir almal. Onthou jy die Samaritaanse vrou by die put (Johannes 4)? Hy het baie tyd gehad om met haar te praat. Toe die dissipels die kinders van Hom probeer weghou het, het Jesus gesê: “Laat staan die kindertjies. Moenie hulle keer om na My toe te kom nie, want God se koninkryk is juis bedoel vir almal wat soos hulle is” (Matteus 19:14).
Hoekom is dit so dat Hy soveel tyd gehad het, en tog het Hy meer gedoen as enige ander persoon wat ooit geleef het? Ek dink dis omdat Hy baie georganiseerd was. Jesus was gedissiplineerd, Hy het altyd vroeg opgestaan en dan alleen iewers gaan bid. Hy het nooit tyd gemors nie, nooit getalm nie; Hy het altyd die werk gedoen gekry.
Ons kry ook baie meer gedoen as ons dinge op God se manier doen. En jy sal ’n baie gawer persoon wees as jy nie heeltyd haastig is nie. Mense sal jou dan vra: “Hoe kry jy dit reg?” Dit is dan jou geleentheid om hulle te vertel van Jesus Christus, die beste Voorbeeld ooit!
Dankie Here dat U vir ons die weg gebaan het…Amen