Gedagte vir die dag: Vind ware vreugde

see_vrou_stiltetyd_pixabay.jpg

Foto: Pixabay.com

God sal julle nie los nie. Hy sal by julle bly. By Hom sal julle veilig en gelukkig voel. (Filippense 4:9)

Vroue stel geluk uit. Luister maar na die gesprek van enige groepie vroue. Die een sal kla oor haar werk en glo dat as sy net eers ’n ander betrekking het, sy gelukkiger sal wees. Iemand anders sê as sy tog net ’n paar kilogram kan verloor, sal haar lewe heeltemal anders wees. ’n Derde een hoop om uit haar huwelik te ontsnap sodat sy haarself kan vind terwyl die vierde kameraad vies is omdat haar tieners haar lewe so versuur. En so bekla ons ons lot gedurig bymekaar.

Nou ja, baie vroue het meer as genoeg rede om sielsongelukkig te wees. Maar dalk moet ons by ’n volgende saamkuier die gesprek in ’n ander rigting stuur deur vir mekaar te vertel waarom ons dankbaar en bly is. Ons weet mos dat daar – ondanks ons omstandighede – altyd iets is waarvoor ons dankie kan sê en waaroor ons gelukkig kan wees.

Besluit om vandag – ten spyte van wat ook al – werklik gelukkig te wees. Jy sal verbaas wees oor hoeveel lewensvreugde daar wél is.

Vader, maak my ’n dankbare en lewensblye mens.

Bron:
Moed vir elke môre deur Milanie Vosloo
Uitgewer: Christelike Uitgewersmaatskappy

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.