DA wil hof toe oor Zuma se parool

Oudpres. Jacob Zuma. (Foto: Emmanuel Croset/AFP)

Die DA het Dinsdag aangekondig dat hy die hof sal nader om die besluit om mediese parool aan oudpres. Jacob Zuma toe te staan te hersien.

Intussen het die burgerregte-organisasie AfriForum ook ’n amptelike skrywe aan Arthur Fraser, nasionale kommissaris van korrektiewe dienste, gerig waarin die besonderhede oor Zuma se paroolvrylating dringend versoek word.

Zuma is Sondag op mediese parool vrygelaat nadat ʼn verslag van sy dokter aan die departement oorhandig is.

John Steenhuizen, leier van die DA, sê die party sal ʼn aansoek in die hof bring om ’n rekord te bekom van die amptelike proses wat gevolg is om oor sy vrylating te besluit.

Die party het vroeër gesê dié besluit is teen die wet, aangesien ʼn versoek om op mediese parool geplaas te word, eers deur ʼn onafhanklike paneel oorweeg moet word.

“Indien dit aan die lig kom dat Fraser sy diskresie gebruik het om die besluit van ʼn hersieningspaneel van die hand te wys, sou ʼn bepaalde proses gevolg moes word.

“Dié proses sluit die verkryging van ʼn mediese verslag deur onafhanklike dokters bo en behalwe dié van Zuma in.”

Volgens Steenhuizen moet sodanige mediese verslag eers aan die paroolraad en dokters betrokke voorgelê word, voordat die kommissaris die hersieningspaneel se besluit van die hand kan wys.

Fraser is boonop ʼn bekende bondgenoot van die voormalige staatshoof en tree oor ʼn paar weke af.

“Dit is uiters belangrik dat die proses nie vir persoonlike of politieke gewin gemanipuleer word nie.

“Dit is veral noodsaaklik gegewe die debakel 12 jaar gelede toe mediese parool op soortgelyke verdagte wyse aan Schabir Shaik toegestaan is.”

AfriForum het ook in sy skrywe inligting oor die proses en besluit om mediese parool aan Zuma toe te staan versoek.

Die organisasie vra spesifiek of Zuma aan ʼn ongeneeslike siekte ly, wat sy mediese parool regverdig. Indien nie, moet besonderhede verskaf word oor die aard van die toestand wat dié besluit genoodsaak het.

AfriForum eis verder volledige terugvoer oor hoe Fraser tot die gevolgtrekking gekom het dat Zuma nie weer sal oortree nie.

Afskrifte van die geskrewe aansoek om mediese parool wat deur Fraser oorweeg is, sowel as die mediese verslag wat aanbeveel dat Zuma op mediese parool geplaas moet word, is ook aangevra.

“Dit is skreiend dat ʼn hoëprofielsaak soos dié in soveel geheimsinnigheid gedompel is.

“ʼn Mens sou dink die departement sou verseker dat daar geen onduidelikheid by die publiek sou wees oor die redes waarom hierdie besluit geneem is nie. Tog blyk dit met die eerste oogopslag dat hierdie besluit geneem is sonder dat daar aan die vereistes van die wet voldoen is,” sê Ernst Roets, hoof van beleid en aksie by AfriForum.

AfriForum sê hy het in die lig van die dringendheid van die aangeleentheid en die potensiële skending van geregtigheid versoek dat Fraser teen 10 September aan die organisasie terugvoer gee.

Volgens Roets sal Fraser se antwoord op AfriForum se skrywe bepaal of verdere regsaksie nodig is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

34 Kommentare

jongste oudste gewildste
marius

Julle blaas teen die wind .

Misky

Ek is werklik bly iemand volg op en laat dit nie net daar gelaat word nie, maar dis soos om teen ‘n muur te baklei. Hulle het te veel om te verloor as Zuma begin praat en Ramamparra mos reeds gesê hy is bly Zuma is vry

JohanR

Sal nooit teen die ANC wen nie. Polisie in die sak. Weermag in die sak. Hofe in die sak. Hoofde in die sak. OVK in die sak. Paroolraad in die sak. Korrektiewe Dienste in die sak. Soos om Everest te klim met 1000kg boomstomp aan jou been vas gemaak! Maar interessant Jacob Zuma is nog soos ‘n dief in die nag, of se maar sommer ‘n dief, want alles word hier tussen 2nm en 4nm gedoen. Toe ons die slaap uit ons oe Maandag more was, is Zuma uit op parool…..finish en klaar!

Aai

Korrupsie sal gepleeg word solank Zumpie daar is.Al sy kaders nog in hulle poste.

Philip

Die kekkelende bandiet makeer net so min soos die man in die maan gee hom net die regte geleentheid en hy umshini wham of wat ook al weer op volle bors.