Video: Dié bekendes vanjaar met Aitsa’s bekroon

Dodo Nyoka wen die toekenning vir nuweling van die jaar en meeste stromings: manlike kunstenaar. (Foto: Maroela Media)

ʼn Rits talentvolle kunstenaars is Dinsdagaand by die Choose Life-ouditorium in Moreletapark, Pretoria, beloon vir hul bydrae tot die Afrikaanse musiekbedryf tydens Pretoria FM se jaarlikse Aitsa-musiektoekennings.

Bekendes soos Karlien van Jaarsveld, Bernice West, Zaan Sonnekus, Loufi en Barto is net ʼn paar van die Afrikaanse kunstenaars wat elk ʼn unieke Aitsa-trofee asook ʼn kontantprys van R10 000 tydens dié spogfunksie ontvang het.

Beoordeling van die rekordgetal inskrywings wat vanjaar vir Aitsa’s ingestroom het, het tussen 7 en 9 Junie 2023 plaasgevind en is deur ʼn paneel onafhanklike beoordelaars behartig. Die paneel het Gisela de Villiers, AJ Opperman, Rian Swanepoel, Carlé van Deventer, Anaretha Naude en Henco Harmse ingesluit.

Twee spesiale kategorieë vir die suksesvolste Afrikaanse liedjie deur ʼn mans- sowel as ʼn vrouekunstenaar – wat deur syfers van stromingsplatforms soos Spotify, Apple Music, YouTube Music en YouTube Video aangedui is – is ook aangekondig.

Bernice West se “Lyfie” asook Die Kontrak-naaswenner, Dodo Nyoka, se “Foto’s” is onderskeidelik met dié toekennings vereer.

Nyoko het ook met dié lied die toekenning vir “nuweling van die jaar” ingepalm.

Klassieke musiek het vanjaar ook meer erkenning kry, met Franco Prinsloo en die Vox Kamerkoor se “Ghoera Liedere” wat die beeldjie vir “klassieke snit van die jaar” verower het.

“Ons het baie navrae ontvang oor die moontlikheid om die Aitsas verder uit te brei deur ook aan die kunstenaars van klassieke musiek erkenning te gee,” het Willie Spies, uitvoerende voorsitter van Pretoria FM en trustee van die Aitsa Trust, voorheen verduidelik.

“Daarom is daar besluit om die kategorieë vir 2023 uit te brei deur steeds die room van Afrikaanse musiek te erken, maar daarmee saam ook ʼn klassieke kategorie by te voeg.”

Die bekende en geliefde Afrikaanse musieklegende, Jannie du Toit, is Dinsdagaand vereer vir sy lewenslange bydrae tot die bevordering van Afrikaanse musiek.

Die befaamde operasangeres, Mimi Coertse (90), is verlede jaar met dié Aitsa-musiektoekenning bekroon. Die Aitsa Trust ken dit jaarliks toe aan ʼn kunstenaar wat oor ʼn lang tydperk baanbrekerswerk vir die ontwikkeling van die Afrikaanse musiekbedryf gedoen het.

“Wat ʼn eer en wonderlike aanmoediging vir die pad vorentoe,” het die “Liedjie vir jou”-sanger oor sy toekenning gesê.

Die publiek het ook weer eens die geleentheid gekry om vir hul gunstelingkunstenaar te stem en vanjaar is dié spesiale toekenning aan die sanger, skrywer en akteur, Steve Hofmeyr, oorhandig.

Die stemme is volgens ʼn voorafbepaalde formule met die beoordelaarsterugvoer gekonsolideer en deur ʼn onafhanklike ouditeursfirma geverifieer.

Die wenners van vanjaar volgens kategorie is:

1. Luisterliedjie van die jaar – Karlien van Jaarsveld en Jacob Swann, “Lief”
2. Vervaardiger van die jaar – Danny Smoke en Tjaart van der Walt, “Ophou”
3. Popliedjie van die jaar – Barto, “Impulsief”
4. Nuweling van die jaar – Dodo Nyoka, “Foto’s”
5. Alternatiewe/rockliedjie van die Jaar – Zaan Sonnekus, “Monitor”
6. Boeremusiekliedjie van die jaar – Die Teelepeltjies, “Misvloer setees”
7. Hiphop/kletsrym liedjie van die jaar – Loufi en Jayms, “Bank Rob”
8. Geestelike liedjie van die jaar – Retief Burger, “Sekelmaan”
9. Instrumentale liedjie van die jaar – CH2, “Simoné”
10. Liedjieskrywer van die jaar – Jacob Swann, “Lief”
11. Klassieke snit van die jaar – Franco Prinsloo en die Vox Kamerkoor, “Ghoera Liedere”
12. Musiekvideo van die jaar – Eric T Graham, “Impulsief” vertolk deur Barto
13. Afrikaanse liedjie van die jaar – Bernice West, “Lyfie”
14. My Kunstenaar-wenner – Steve Hofmeyr
15. Lewenslange bydrae – Jannie du Toit
16. Meeste stromings: Manlik – Dodo Nyoka, “Foto’s”
17. Meeste stromings: Vroulik – Bernice West, “Lyfie”

Jannie du Toit wen die toekenning vir lewenslange bydrae. (Foto: Maroela Media)