Kuba-skenking: ‘SA kan nie oë sluit’ – Pandor

Naledi Pandor, minister van internasionale betrekkinge en samewerking (Foto: SA regering/Facebook)

Suid-Afrika kan nie sy oë sluit vir die lot van Kuba terwyl hul ekonomie deur “onwettige blokkades en sanksies” gewurg word nie.

Naledi Pandor, minister van internasionale betrekkinge en samewerking, het tydens haar departement se begrotingsrede gesê Suid-Afrika is ook bereid en daartoe verbind om “in solidariteit met ons broers en susters in Kuba op te tree”.

“Die Kubaanse ekonomie is op sy knieë gedwing ná 61 jaar van drakoniese Amerikaanse ekonomiese sanksies wat op daardie verarmde eilandnasie ingestel is. Dít is ’n nasie wat skouer aan skouer saam met ons vegters gestaan het in die stryd om vryheid en ons moet help as ons kan.

“Dit was Kubane wat hul seuns en dogters gestuur het om te veg vir die bevryding van Suider-Afrika. Natuurlik kan diegene wat nooit in die loopgrawe was en vir vryheid geveg het nie, nie hierdie geskiedenis waardeer of ken nie. Kuba het ’n deurslaggewende rol gespeel om die gety teen ons koloniale onderdrukkers te laat draai. Dit sou onregverdig en oneties wees om die rug op hulle te keer in die uur van hul grootste nood.”

Die Pretoriase hooggeregshof het Dinsdagoggend die regering se aansoek om verlof tot appèl teen ’n interdik wat hom verbied om R50 miljoen aan Kuba te skenk, van die hand gewys.

(Foto: Yamil LAGE/AFP)

Die departement van internasionale betrekkinge en samewerking (Dirco) het vroeër onderneem om miljoene aan Kuba te skenk in ’n poging om die voedseltekort in dié land te help verlig. Dié aankondiging is egter wyd gekritiseer, gegewe die stygende werkloosheidsyfer en armoede in Suid-Afrika.

Volgens Pandor is die Afrika Renaissance-fonds (ARF) op die been gebring vir die doel van humanitêre bystand. “Ons gebruik nie die ARF-fonds as ’n oop beursie nie. Dit is glad nie waar nie. Daar is geen R50 miljoen wat aan Kuba gegee of geskenk sal word nie. Ons beplan om humanitêre hulp aan Kuba te verskaf – voedsel en mediese voorrade wat by Suid-Afrikaanse maatskappye gekoop en na Kuba verskeep sal word om daardie nasie in sy lyding te ondersteun.”

AfriForum het tydens sy saak teen die regering aangevoer die skenking is strydig met die ARF omdat dit nie aan ’n Afrika-land geskenk word nie.

Willem Faber, DA-lid van die portefeuljekomitee oor internasionale betrekkinge en samewerking, het in reaksie op Pandor se uitlatings gesê dit is klaarblyklik ’n poging deur die ANC-regering om die hof se weiering van sy aansoek om te appelleer, te omseil.

“Hierdie blatante verontagsaming van ’n hofbevel is ’n belediging vir die miljoene Suid-Afrikaners wat sukkel om te oorleef. Dit is duidelik dat die ANC se alliansie met Kuba bo ons eie kwesbare burgers gekies is. Hoe kan die ANC-regering verligting vir Kuba regverdig, terwyl geldelike hulp vir KwaZulu-Natal niks anders as leë beloftes was nie?”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

79 Kommentare

jongste oudste gewildste
Rudi

Skenk eerder die geld vir Sa se eie arm mense of maak die land se paaie reg.

Nie Verbaas

Is hierdie vrou by haar volle positiewe? Kyk wat gaan in jou eie land aan of is jou party en die se kaders meer belangrik as die honger mense in Suid Afrika? Het Kuba nie genoeg geld gemaak met die dokters en ingenieurs wat julle na Suid Afrika toe laat kom het nie?

Wondermaarnet

Pandor as jy so sterk voel, kan jy en jou kaders julle persoonlike finansies aanwend om te help. Ek betaal belasting vir SA en NIE vir ander lande nie. Ek kry ook swaar, maar jy en jou kaders gee nie om nie.

Porseleintjie

Wanneer die regering nie oor die vermoe beskik om sy eie burgers te help nie, ja dan kan jy jou oe sluit. Jou lojaliteit is misplaas pandor. Lig jou sitvlak uit jou gemaksone en kom kyk hoeveel boemelaars en bedelaars in jou eie land is. Hoeveel van jou eie mense sterf weens honger. Dis waar jou plig eerste le.

Frank

Waar kom die gedrog vandaan ?