‘Lang herstelpad’ lê voor vir Vernon Koekemoer

Linda Coetzee en Vernon Koekemoer. (Foto: Verskaf)

ʼn Lang herstelpad lê nog vir Cassie Booyse, beter bekend as die internetsensasie Vernon Koekemoer, voor nadat hy Maandag weer ʼn heupoperasie ondergaan het.

Só sê Linda Coetzee, Booyse se lewensmaat van die afgelope nege jaar, aan Maroela Media.

Booyse (66) het Maandag ʼn vierde operasie ondergaan nadat hy sedert 2019 drie onsuksesvolle operasies ondergaan het.

Booyse is die afgelope twee jaar bedlêend weens dié mislukte operasies en was in soveel pyn dat hy in September vanjaar weer in die hospitaal beland het.

Volgens Coetzee is die “goeie nuus” dat dokters by die Charlotte Maxeke-hospitaal in Johannesburg, waarheen Booyse verlede week oorgeplaas is, nie van sy been verwyder het nie.

“Die dokters het sy heup en die been skoongemaak. Hulle het ook ʼn spasieerder in sy heup geplaas. Dit is ʼn prostese wat gebou is met sement en antibiotika en sal help om enige bakterieë wat agtergebly het, te beveg,” verduidelik Coetzee.

Cassie Booyse in 2008. (Foto via Facebook)

Booyse moet oor sowat ses weke weer deur dieselfde proses gaan indien die infeksie nie opgeklaar het nie. “Sodra die infeksie opgeklaar het, kan hy weer ʼn heupvervanging ondergaan.”

Coetzee sê hoewel dit onder omstandighede goed gaan met Booyse, is hy nog swak en sukkel hy met sy bloeddrukvlakke.

Booyse is voorheen in die Tambo-gedenkhospitaal in Boksburg behandel. “Dit het skielik gebeur dat hulle ʼn bed vir hom gehad het by die Charlotte Maxeke-hospitaal. Daar is ʼn beduidende verskil tussen die hospitale. Ek voel verlig, want ek weet nou hy is in goeie hande. Ek dank die Here daarvoor.

“Hy het ongelooflik baie pyn, maar dit sal binnekort beter met hom gaan. Ons is dankbaar vir almal se omgee, gebede en liefde.”