Leerders geskors ná vuisgeveg by HTS Witbank

‘n Skermskoot uit die video.

Die LUR vir onderwys in Mpumalanga sal Donderdag die Hoër Tegniese Skool Witbank besoek nadat ‘n geveg tussen leerders op video verfilm is en sedertdien wyd versprei word.

Die video wys hoe twee leerders mekaar bydam en ander leerders ook later by die vuisgeveg betrokke raak voor daar tussenbeide getree word. Die voorval het Dinsdag plaasgevind.

HTS Witbank het in ‘n verklaring gesê hy is bewus van die video van ʼn bakleiery wat wyd op sosiale media versprei word.

“Die bestuurspan en beheerliggaam van HTS Witbank het onmiddellik opgetree volgens die gedragskode van die skool. Die betrokke leerders is geskors hangende ʼn dissiplinêre verhoor.

“Ons verseker die skoolgemeenskap dat alle leerders se veiligheid die skool se topprioriteit is en dat akademie voortgaan soos normaal,” lui die verklaring. Maroela Media het navraag gedoen oor hoeveel leerders geskors is en wag op terugvoer.

Jasper Zwane, woordvoerder van die provinsiale onderwysdepartement, het gesê LUR Bonakele Majuba sal die skool besoek om vas te stel wat presies tot die voorval aanleiding gegee het en om te verseker dat die skuldiges aan die pen ry.

Zwane het beweer dit blyk ‘n “rassegeveg” te wees. Daar kan in die video gesien word dat wit en swart leerders by die geveg betrokke was.

“Die beeldmateriaal is ontstellend en hierdie gedrag word met die grootste erns veroordeel. ‘n Skool is ‘n plek waar onderrig en leer moet plaasvind in ‘n omgewing wat te alle tye veilig is en vry is van enige vorm van intimidasie, geweld en misbruik in enige vorm.

“Dit moet plaasvind waar die welstand van alle leerders altyd geprioritiseer word,” het Zwane gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

28 Kommentare

jongste oudste gewildste
Frank

Ai, in my dae het ons net ses van die bestes by die hoof gekry en alles is uitgesorteer en verby.
Maar nou ja, deesdae kom die benadeelde met ‘n mes of AK die volgende dag terug skool toe…

Potties.

Sterkte vir die kinders wat betrokke is .

Samuel

Moet hierdie noodwendig ‘n rassegeveg wees? Waarom kan dit nie bloot jongens wees wat werklik kwaad was vir mekaar nie? Die raskaart word heeltemal te maklik gespeel. Pffft.

Ovelia

Hoe lekker kry die Eff nou. Seker apartheid se skuld

Adam Adriaan

60 Jaar terug sal die nuus nie eers die plaaslike skinder groepie by die ouetehuis gehaal het nie.