Luister: 50-jarige vrou vertel van angsnag in selle

Sandra*

Sandra*

ʼn 50-jarige ma en ouma het Donderdagnag vreesbevange “die langste nag van haar lewe” in ʼn donker, nat, koue tronksel deurgebring nadat sy in hegtenis geneem is omdat sy glo geld by haar werkgewer geneem het om vir haar familie te sorg.

Glo omring deur rotte, en met die stank van vuil verstopte toilette, moes sy ook vir sowat ʼn uur die angsgille aanhoor van ʼn man wat glo deur ʼn medegevangene verkrag is.

ʼn Duidelik getraumatiseerde Sandra* het Vrydag aan Maroela Media vertel van dié beweerde nagmerrie wat sy in die Hillcrest-polisiestasie in KwaZulu-Natal se aanhoudingselle moes deurmaak en wat tot haar inhegtenisneming gelei het.

“Ek het sowat ʼn jaar gelede vir ʼn onderneming begin werk wat kiste vervaardig. Ek was takbestuurder van een van die maatskappy se takke in Soweto in Gauteng,” het Sandra gesê.

Sandra het verduidelik dat haar seun, skoondogter en twee kleinkinders, onderskeidelik twee en een jaar oud, saam met haar in ʼn huis in Johannesburg gewoon het. Almal was van haar afhanklik. “My seun en sy vrou was werkloos. Die nood het geklop. My kleinkinders het kos en doeke benodig. Ek het begin geld vat by my werkgewer met die bedoeling om dit terug te betaal as ons weer op ons voete was. Ek het die geld gevat om aan die lewe te bly,” het Sandra in trane gesê.

ʼn Verteenwoordiger van die maatskappy se hoofkantoor het Sandra se tak op 19 Augustus vanjaar besoek. Sandra het gesê sy het oop kaarte gespeel en aangedui dat sy geld gevat het, maar wel onderneem om met behulp van haar familie R15 000 ʼn maand terug te betaal om te vergoed vir die nagenoeg R120 000 wat sy oor ʼn tydperk geneem het.

ʼn Tugverhoor, waar sy nie opgedaag het nie, en haar ontslag het gevolg. Sy het gesê sy was te bang vir haar bestuurder en was nie lus om deur haar verneder te word nie. Sy was steeds van plan om die geld terug te betaal.

Haar werkgewer het haar laaste salaris, asook pensioen en verlof, ter waarde van nagenoeg R18 000, teruggehou, en sy het aangeneem hulle het haar aanbod aanvaar en gaan haar nie vervolg nie. Sy het egter glo nie internettoegang gehad om ʼn e-pos deur haar werkgewer te lees waarin laasgenoemde sê die aanbod is nie aanvaar nie.

Sy het intussen by haar dogter en skoonseun in Durban gaan bly. “My seun het onlangs sy eie onderneming in rekenaars begin en sukkel nog om ʼn bestaan in Johannesburg te maak,” het Sandra gesê.

“Vroeg in September het ʼn ondersoekbeampte my uit Soweto gebel en gesê daar is ʼn strafregtelike aanklag teen my aanhangig gemaak. Ek was toe onder die indruk my werkgewer het my aanbod aanvaar aangesien ek nie my laaste salaris gekry het nie. Ek het die beampte so ingelig en die beampte het gesê sy sal terugkom na my toe. Sy het nooit.”

Die Hillcrest-polisie het Sandra Donderdagoggend by haar dogter se huis in Durban in hegtenis geneem. Sy is na die aanhoudingselle by die stasie geneem en moes Donderdagnag daar deurbring. Wat daar gebeur het, vertel sy in haar eie woorde:

Sy is Vrydagoggend na die Pinetown-landdroshof geneem en het nooit in die hof verskyn nie, aangesien die saak nie op die hofrol was nie weens probleme met Sandra se lasbrief vir inhegtenisneming.

Maj. Thulani Zwane, provinsiale polisiewoordvoerder van KwaZulu-Natal, het Vrydagaand by navraag van Maroela Media gesê die toestand van die aanhoudingselle is nie soos wat Sandra beweer nie. Dit word daagliks geïnspekteer en skoongemaak.

“Daar is nie ʼn probleem by die selle nie. Die toilette is nie vuil en verstop nie en daar is ook geen rotte in die selle gewaar nie,” het Zwane gesê.

By navraag oor die beweerde verkragting wat Sandra in ʼn sel langs haar gehoor het, het Zwane gesê geen amptelike klagte van enige ander gevangene is by die polisie aangemeld nie.

Sandra se skoonseun het gesê hulle gaan regstappe doen aangesien hulle meen sy skoonma se menseregte is geskend. Hy het gesê daar is ook glo nie die nodige prosedure gevolg tydens haar inhegtenisneming nie.

Vir Sandra is die nagmerrie egter nog nie verby nie. Sy sal eersdaags in ʼn Johannesburgse hof moet verskyn waar sy amptelik aangekla gaan word.

*Sandra is ʼn skuilnaam wat die vrou moet gebruik aangesien sy nog nie amptelik in die hof verskyn het nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

40 Kommentare

jongste oudste gewildste
Jacques

Daar is mos maar altyd my storie jou storie en die waarheid. Sy klink maar asof haar weë en die van die waarheid nie te gereeld kruis nie. Sy het verskeie geleenthede gehad om die saak op te los maar het verkies om die oplossing te vermy. Die probleme los hulself nie op nie. Tronkstorie klink ook maak aangedik.

Adoons

Sy steel R120,000 van haar werkgewer, maar sy sien haarself as die slagoffer. Nee wat, ek het nie juis simpatie nie.

Bleek Sannie

As hulle werklik so swaar gekry het, moes sy maar eerder ‘n ander plan gemaak het as om te steel. Ek weet van baie mense wat bitter swaarkry wat nooit sal loop en steel nie. Eerlike, beginselvaste mense wat wat sou gee vir ‘n werkie. Darem ‘n goeie ding dat iemand anders nou haar werk gaan kry, iemand wat dit verdien. Elke wolk het ‘n silwer rantjie!

Antoinette

Ouch Jacques, maar ek moet ook sê dit klink of Sandra weggekruip het eerder as om oop kaarte te speel. Geen werkgewer gaan sover om iemand in hegtenis te laat neem as hulle dink hulle gaan die geld terugkry nie. R120 000 – R18 000 is R102 000. Nogals baie geld en het Sandra enigsins die R15 000 begin terugbetaal?

geen simpatie

As jy nie het nie, soos ek ook baie dae deur moet gaan, VRA!!!!!! liewer, dan gaan dinge dalk baie beter vir jou wees in die toekoms, geen simpatie, daar is BAIE wat sukkel.