Name bekend van egpaar wat in voertuig doodgeskiet is

'n Piesangplantasie. Argieffoto.

‘n Piesangplantasie. Argieffoto.

Die egpaar wat Dinsdag in KwaZulu-Natal doodgeskiet is terwyl hulle in hul voertuig gery het, se name is bekend gemaak.

Kapt. Thulani Zwane, ʼn polisiewoordvoerder, het Woensdag aan Maroela Media gesê die egpaar is as Maureen (46) en Nishen Maharaj (48) uitgeken.

Maroela Media het Dinsdag berig die skietery het omstreeks 07:45 in Verulam plaasgevind. Zwane het gesê Nishen was op pad om sy vrou by haar werkplek, ʼn winkel in Umhlali, af te laai. “Toe die egpaar by die winkel aankom, was vyf gewapende mans besig om die winkel te beroof,” het Zwane gesê. “Nishen het probeer wegjaag, maar die verdagtes het op hul voertuig losgebrand en hulle is raakgeskiet. Hulle kon daarin slaag om van die toneel te vlug, maar ongeveer ʼn kilometer van die winkel af het Nishen beheer oor die voertuig verloor en in ʼn piesangplantasie ingery.”

Toe paramedici en die polisie by die toneel opgedaag het, was Maureen reeds dood. Nishen het kort daarna aan sy beserings beswyk.

Die verdagtes het met ʼn onbekende hoeveelheid kontant, selfone en die winkeleienaar se vuurwapen van die toneel gevlug.

Die Umhlali-polisie ondersoek ʼn saak roof met verswarende omstandighede en twee sake van moord.

Niemand is nog in verband met die voorval in hegtenis geneem nie. Die ondersoek duur voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

Ria Maritz ·

Dis verskriklik om op te staan in die oggend, mens se dag is reeds vooruit beplan, en in ‘n oogwink word jy van jou lewe beroof en kinders wees gelaat om sonder vader of moeder die toekoms te moet ingaan.

Pieter ·

Goeie more Ria, ek het die stukkie gemis waar hulle praat van die kinders. Waar het jy dit gelees?

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.