‘Onaanvaarbare werkstoestande’ vir weermaglede

Lugverkoeling (Foto: Pixabay)

“Die toestande is onmenslik en onaanvaarbaar.”

Só voel werknemers wat in die weermag se verdedigingshoofkwartier in Erasmusrand, Pretoria, sonder lugverkoeling moet werk.

Dié gebou asook die hoofkantoor van die Suid-Afrikaanse Lugmag (SALM) in Dequorweg in die Pretoriase middestad se lugverkoelingstelsels is weer buite werking.

Dit volg nadat daar onderskeidelik in Maart en Februarie vanjaar melding gemaak is oor hierdie gebou se lugverkoelingstelsel wat stukkend is. Die stelsels was toe reeds etlike maande lank stukkend.

“Ons weet nie of die stelsel nou weer stukkend is of net nooit reggemaak is nie,” sê ʼn personeellid wat in die gebou in Erasmusrand werk.

Die personeellid het op voorwaarde van anonimiteit aan Maroela Media gesê die temperature het Maandag voor 08:00 reeds 29 °C in die kantoor gemeet.

Volgens die SALM is sy hoofkantoor in die Pretoriase middestad onbewoonbaar weens die stukkende lugverkoelingstelsel en het hy in ’n verklaring bevestig dat sy leierskap volle beheer oor die situasie neem.

“Die gesondheid, mediese toestand en veiligheid van die lede word as kwessies van dringendheid beskou. ’n Gesamentlike benadering en tussentydse gebeurlikheidsmaatreëls word gebruik om die situasie te hanteer,” sê brig.genl. Mongezi Kweta, woordvoerder van SALM.

Die SALM het ’n opdrag uitgereik om die voetspoor van lede wat die gebou op spesifieke tye beset te verminder, ten einde te voldoen aan die vereistes van lede met onderliggende mediese toestande wat veroorsaak word deur ’n gebrek aan vars suurstof en uiterste hitte, ’n situasie wat tans in die gebou ervaar word.

“’n Opdrag en verskeie gebeurlikheidsplanne is uitgereik om die saak op tydelike grondslag aan te pak, terwyl langtermynmaatreëls van Suid-Afrikaanse Militêre Gesondheidsdienste-spesialiste aangevra word.

“Die leierskap sal die nodige leiding gee oor verdere gebeurlikhede gegrond op bevindings en aanbevelings deur verskeie spesialiste. Daar is voortdurend gesprekke buite die gewone SALM-forums en -kanale wat bedoel is om te verseker dat die sake rakende hierdie kwessie vinnig aangepak word, veral vir die gesondheid en veiligheid van die lede.”

Volgens die personeellid in die weermag se verdedigingshoofkwartier in Erasmusrand word daar net skouers opgetrek oor hul situasie.

“Hulle verwag omdat ons vir die weermag werk, moet jy in enige toestand kan werk, maar hierdie toestande is onmenslik. Die personeellede sukkel om in die bedompige kantore te konsentreer en hul werk te verrig soos hulle moet.”

Die gebou is só ontwerp dat die meeste kantore nie vensters het om oop te maak vir vars lug nie.

Die personeellid is sedert Maart genoop om ’n asmapompie te gebruik en is ook met hoë bloeddruk gediagnoseer.

“Hoë bloeddruk, saam met asma en ’n kopseer, is nie ’n goeie kombinasie nie.”

JG Greeff, die Suid-Afrikaanse Nasionale Weermagunie (Sanwu) se nasionale sekretaris, het vroeër aan Maroela Media gesê die gebrek aan verkoeling en swak ventilasie in die geboue hou ’n ooglopende bedreiging vir die gesondheid van personeel in.