Ramaphosa vol lof vir NGV

Argieffoto (Foto: StockSnap, Pixabay)

Die regering is vasbeslote om die nasionale gesondheidsversekering (NGV) te implementeer, ten einde te verseker dat nie net ʼn klein deel van die bevolking toegang het tot gehalte mediese sorg “soos tydens kolonialisering en apartheid” nie.

Só sê pres. Cyril Ramaphosa in sy jongste weeklikse nuusbrief.

Ramaphosa sê dit is een van die grootste tragedies van ons tyd dat toegang tot gehalte gesondheidsorg afhang van ʼn persoon se vermoë om daarvoor te betaal. “Dit druis in teen mense se grondwetlike reg tot ordentlike gesondheidsorg.”

Hy sê Suid-Afrika het twee parallelle gesondheidstelsels. “In die een word ongeveer R250 miljard bestee aan 20% van die bevolking. Hierdie deel van die Suid-Afrikaanse bevolking het toegang tot private mediese versekering. Aan die ander kant word R220 miljard bestee aan die res van die bevolking se mediese behandeling.” Ramaphosa sê dié stelsel kan nie voortduur nie. “Dit is onregverdig en onvolhoubaar.”

Die ingang na die Chris Hani-Baragwanath-hospitaal in Soweto. (Foto: Thabiso Makelo/Panoramio)

Daarom, sê die president, wil die regering die NGV instel. Ramaphosa sê die NGV sal een van die verreikendste dade van maatskaplike transformasie wees wat die land sedert 1994 ervaar het. “Ons het genoeg hulpbronne in hierdie land om te verseker dat elke man, vrou en kind behoorlike gestandaardiseerde gehalte gesondheidsorg ontvang.”

Maroela Media het egter by verskeie geleenthede reeds berig oor staatshospitale wat te min personeel of toerusting het om behoorlike diens te lewer, juis weens ʼn tekort aan finansiering in staatshospitale. Daar is ook ʼn dringende tekort aan verpleegsters in Suid-Afrika om die hele Suid-Afrikaanse bevolking te dien en studies het gewys dat die regering nie genoeg geld het om die NGV te implementeer nie.

Nietemin, Ramaphosa sê die NGV sal die ongeregtighede wat gepleeg is tydens kolonialisme en apartheid, toe slegs ʼn klein minderheid toegang gehad het tot behoorlike mediese sorg, regstel.

“In 1713 het die Hollandse kolonialiste pokke na die land gebring, maar slegs ingevoerde medisyne gebruik om hul eie mense te behandel, en die Khoisan gelaat om dood te gaan weens die uitbraak,” skryf Ramaphosa. “Onder apartheid het mense toegang gehad tot mediese sorg op grond van hul verkleur.”

Ramaphosa sê die openbare verhore wat die afgelope maande landswyd plaasgevind het, het gewys daar is uitgebreide behoefte aan ʼn fundamentele hersiening van Suid-Afrika se gesondheidstelsel.

Hy sê egter die regering sal nie “roekeloos” te werk gaan om die NGV te implementeer nie. “Ons sal dit stapsgewys doen en beoog om die hele land teen 2025 te dek.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Sandvygie

Ja en wie gaan nou weer daarvoor betaal?

Nie Verbaas

Se die mense wat nie eers staats hospitale kan bestuur nie. Hier kom nog n ANC debakel wat nie gaan werk nie.

Nette

Hoekom is daar nie eerder van 1994 nog staats hospitale gebou nie? Eintlik erken hy net dat alle staatsondernemings nie voldoen aan die mense van SA se behoeftes nie, maar ongelukkig kan hy dit nie in soveel woorde sê nie, nou blameer hy weer apartheid, want hy weet die volk sit regop met gespitsde ore sodra hulle apartheid hoor, en almal skreeu VIVA. Wel as dit die geval is sal ek ook maar Kuba toe gaan vir mediese behandeling, ek sien dit is die in ding…

Joggie

Hy lieg so, hy gaan homself begin glo!

Jakes

Natuur lik sal dit die ideale ding wees om elke landsburger die beste mediese hulp denkbaar te gee.
Dit sal in die praktyk n onbegonne taak wees. Mediese behandeing in staatshospitale is van n swak gehalte weens onbevoegdheid van sekere personeel. Sal CR vir n jar lank n staatspasient wees sodat hy eerstehand kan sien hoe sleg dit eintlik gaan?